د طالبانو سترې محکمې خبر ورکړی، چې د هېواد په بېلابېلو ولایتونو کې د دوی محاکمو د روانې وري میاشتې په تېره اونۍ کې ۲۴کسانو باندې د دُرو وهلو حکمونه صادر کړي او دا سزاوې تطبیق شوي هم دي. دغه سزاوې د کابل په ګډون سرپل، فاریاب، خوست او غور کې پلي شوي دي.
د خبرپاڼې له مخې، په ټولیز ډول په یوه قضیه کې ۱۵ تورن کسان، په بله کې شپږ او همدارنګه په جلا جلا قضیو کې پر درییو نور کسانو د طالبانو محکمو د درو وهلو پرېکړې کړې وې. طالبانو زیاته کړې چې دغه سزاوې یې د اسلامي شریعت په رڼا کې پر «مجرمینو» عملي کړي دي.
د جزیاتو له مخې، په یوه قضیه کې د طالبانو کابل ولایت لومړنۍ محکمې د نشهيي توکو او مسکراتو اړوند قضیو په تړاو پر ۱۵ کسانو د تعزیري سزا حکم صادر او عملي کړی دی. همدارنګه، په سرپل ولایت کې هم ورته حکم پر ۶ تنو تطبیق شوی دی.
طالبانو ویلي چې د دغو حکمونو د پلي کېدو موخه د عدالت ټینګښت، د جرمونو مخنیوی او د ټولنیز نظم ساتنه ده، او ټینګار یې کړی چې د قضیو د څېړنې او ارزونې بهیر به په پرلهپسې ډول دوام ولري.
د طالبانو پر دغو سزاوو د بشري حقونو یو شمېر سازمانونو تر دې مخکې سختې نیوکې کړي دي. په دې وروستیو کې ملا هبت الله د جزایي اصولنامې په نوم خپلو محکمو ته یوه کړنلاره توشیع کړې چې پکې د بشري حقونو د نقض، د ټولنیز عدالت نا انډولي او همدا راز د طبقاتي نظام د رامنځته کېدو نیوکې شوې دي.
