د افغانستان ۱۷ کلنو فوټبال ملي لوبډله د ازبکستان پر وړاندې ماته شوه
د افغانستان د ۱۷ کلنو فوټبال ملي لوبډلې د مرکزي اسیا د ملتونو جام (کافا) سیالیو په لړ کې خپله درېیمه لوبه د درې پر صفر د ازبکستان پر وړاندې وبایلله.
دغه لوبه د پنجشنبې په ورځ، د وري ۲۰مه، په ازبکستان کې ترسره شوې وه، چې پکې د کوربه لوبډلې لوبغاړو دوه ګولونه په لومړۍ نیمایي او یو ګول په دویمه نیمایي کې د افغانستان پر لوبډلې ترسره کړل.
د افغانستان ۱۷کلنې لوبډلې تر دې وړاندې هم خپلې دوه نورې لوبې ترسره کړې وې؛ چې یوه یې دوه پر یو د قرغیزستان پر وړاندې بایللې او بله یې د ترکمنستان سره په بېګوله مساوي پای ته رسولې وه.
ټاکل شوې ده چې افغان ځوانان به د شنبې په ورځ د سیالیو په دوام کې له تاجکستان سره مخ شي.
د کافا د ۱۷کلنو سیالۍ د ازبکستان په کوربهتوب د افغانستان، ازبکستان، تاجیکستان، ترکمنستان او قرغیزستان د لوبډلو په ګډون ترسره کېږي.
