یو کوچني افغان ورزشکار د امریکا د کېکبوکسېنګ ملي لوبډلې ته لار موندلې
یو کوچنی افغان ورزشکار عثمان ملکزاده د کېکبوکسېنګ په بېلابېلو سیالیو کې له کلونو ځلېدو وروسته وتوانېده، چې د امریکا د کېکبوکسېنګ لوبډلې ته لار ومومي. دغه تنکي ځوان د امریکا د بېلابېلو ایالتونو ترمنځ په ۲۱ ملي سیالیو کې د بریا ترلاسه کولو سره دغه لاسته راوړنه خپله کړه.
هغه په دغه موده کې وتوانېده، چې له خپلو مهارتونو او استعداد سره د غوره کسانو په ډله کې راشي. عثمان ملکزاده په ۲۰۱۴کال کې په پنجشېر ولایت کې زېږېدلی او په درې کلنۍ کې له خپلې کورنۍ سره امریکا ته کډه شوی دی.
هغه له کوچنیوالي د رزمي لوبو په ځانګړي ډول کېکبوکسېنګ سره مینه لرله او خپله مسلکي لاره یې د ټېکساس ایالت په یوه کلب کې پیل کړه. هغه ډېر ژر پرمختګ وکړ او وتوانېده، چې ځان د یوه پیاوړي لوبغاړي په توګه وپېژني.
عثمان ملکزاده ته نږدې کسان هغه د یوه هڅانده لوبغاړي په توګه یادوي او باور لري، چې هغه به په نږدې راتلونکې کې د تنکیو ځوانانو او ځوانانو لپاره په ځانګړي ډول په امریکا کې د افغان کډوالو ترمنځ یو الهامبښونکې بېلګه شي.
