د افغانستان د خلکو وحدت ګوند مشر محمد محقق له افغانستان انټرنشنل سره په خبرو کې د پاکستان د پوځ مشر عاصم منیر د ستاینې لیک په اړه وضاحت ورکړ. نوموړي ویلي، د پاکستان ستاینه یې ځکه کړې چې د اوربند لپاره یې هڅې کړې دي.
محمد محقق په خپلو څرګندونو کې وویل، د ایران جګړې نه یوازې سیمه، بلکې ټوله نړۍ اغېزمنه کړې او په دغه هېواد کې مېشت پنځه میلیونه افغان کډوال یې هم له سختو ستونزو سره مخ کړي دي. نوموړي ادعا وکړه چې د امریکا ولسمشر ډونالډ ټرمپ د نړۍوالو افکارو تر فشار لاندې د ایران لس مادهییز وړاندیز منلی او هغه یې «تر ټولو غوره وړاندیز» بللی دی.
محقق زیاته کړه، که څه هم ایران د لسو مادو ترڅنګ ۱۹ نورې مادې هم یادې کړي چې جزییات یې لا نه دي روښانه شوي، خو دی په خپله د امریکا او ایران ترمنځ وروستي توافق ته ډېر هیلهمن نه دی. د هغه په وینا، د جګړې د کنټرول واک تر ډېره د اسرائیل د لومړي وزیر بنیامین نتنیاهو په لاس کې دی.
محمد محقق د وري په ۱۹مه د پاکستان د پوځ مشر عاصم منیر ته په یوه لیک کې د ورور خطاب کړی او د اسلاماباد په منځګړیتوب یې د ایران او امریکا ترمنځ د اوربند هڅې ستایلې وې.
نوموړي ویلي و، پاکستان په دې اقدام سره ثابته کړه، چې په سیمه کې د سولې او ثبات مدافع دی.
په لیک کې راغلي:« په دغه تاریخي ګام سره چې تاسو اخیستی دی، تاسې نه یوازې د پاکستان د ملت سر لوړ کړی، بلکې تاسې سیمه او نړۍ له لوی انساني ناورین څخه هم ژغورله».
نوموړي په دغه لیک کې د افغانستان وضعیت ته هم اشاره کړې او د افغانستان او پاکستان ترمنځ د اړیکو پر ټینګښت او لا نږدېوالي د ټینګار ترڅنګ یې هیله ښودلې چې افغانستان د ترهګرو ډلو له شر څخه خلاص او په انساني ارزښتونو ولاړ یو نظام رامنځته شي.
