د خیبر پښتونخوا په کورمه کې د چت پرېوتو په دوو جلا پېښو کې ۴ ماشومان مړه شوي
د خیبر پښتونخوا ځایي چارواکو ویلي، چې د وروستیو سختو ورښتونو له امله د دغه ایالت په کورمه کې د چت پرېوتو په دوو جلا پېښو کې څلور ماشومان مړه شوي دي. د راپورونو له مخې؛ لومړۍ پېښه د کورمې په دوراني سیمه کې رامنځته شوې، چې پهکې د یوې کورنۍ درې ماشومان مړه شوي دي.
دویمه پېښه په زیړان تاجک سیمه کې شوې، چې له امله یې یو دوه کلن ماشوم مړ او یو بل ټپي شوی دی. د کورمې ځایي چارواکو ویلي، چې په وروستیو ورځو کې په ټوله کورمه کې د چتونو پرېوتو شپږ پېښې ثبت شوې دي.
بل لور ته ویل کېږي، چې د خیبر بښتونخوا ایالت په مومندو ولسوالۍ کې هم د سېلابونو له امله خلکو ته پراخ مالي زیانونه اوښتي، ګڼ کورونه زیانمن شوي او یوشمېر کورونه تر اوبو لاندې شوي دي.
