پاکستان د بالکان په سیمه کې د سولې د ټینګښت لپاره د دوامداره او جدي خبرو اترو غوښتنه وکړه
په ملګرو ملتونو کې د پاکستان استازي په اسلاماباد کې د امریکا او ایران ترمنځ د اوربند په تړاو د خبرو سره په ورته مهال د بالکان په سیمه کې هم د تلپاتې سولې لپاره د جدي خبرو اترو غوښتنه کړې ده.
په ملګرو ملتونو کې د امنیت شورا غونډې ته د وینا پر مهال، د پاکستان دایمي استازولۍ مرستیال سفیر عثمان جادون وویلي، هېواد یې هیله لري چې په بالکان سیمه کې تلپاتې سوله او ثبات رامنځته شي. د پاکستاني رسنیو د راپور له مخې، نوموړي زیاته کړې چې پاکستان د سیمې د خلکو هوساینې او سوکالۍ ته ژمن دی او د شخړو د حل یوازینۍ لاره ډیالوګ ده.
دا په داسې حال کې ده چې د پاکستان پلازمېنه اسلام اباد د امریکا او ایران ترمنځ د مذاکراتو کوربتوب کوي او د مذاکراتو لپاره سخت امنیتي تدابیر نیول شوي دي.
پر همدغه مهال والسټریټ ژورنال ورځپاڼې راپور ورکړی، چې د ایران د پارلمان د مشر محمد باقر قالیباف په مشرۍ پلاوی له امریکا سره د اوربند په تړاو د خبرو په موخه د پاکستان پلازمېنې اسلاماباد ته رسېدلی دی.
