ملګري ملتونه: په منځني ختیځ کې د جګړو له امله د ښځو او نجونو وضعیت کړکېچن شوی
د ملګرو ملتونو د ښځو ادارې په یوه راپور کې ویلي، چې په منځني ختیځ کې وروستیو نښتو د ښځو او نجونو وضعیت سخت کړکیچن کړی دی. یادې ادارې د امریکا او ایران ترمنځ د دوه اوونیو د اوربند هرکلی کړی، خو په لبنان کې یې د اسراییل پر بریدونو اندېښنه ښودلې ده.
د ملګرو ملتونو د ښځو ادادرې په خپل وروستي راپور کې ویلي، چې په منځني ختیځ کې د روانې شخړې په پایله کې یوازې په وروستیو ورځو کې سلګونه کسان وژل شوي، چې ډېری یې ښځې او نجونې دي. د راپور لهمخې، په ایران او لبنان کې د ښځو د مرګ ژوبلې شمېر د پام وړ لوړ ښودل شوی او د جګړې له امله میلیونونه خلک بېځایه شوې دي.
د ملګرو ملتونو د ښځو اداره وایي، چې بېځایه کېدل، د روغتیايي خدماتو کمښت، د خوړو د لاسرسي نه شتون او د بنسټیزو اسانتیاوو نشتوالي د ښځو لپاره جدي ګواښونه رامنځته کړي دي. دغې ادارې ټینګار کړی چې د ټولو لوریو ترمنځ اوربند باید وغځول شي او عادلانه سولې ته دې لار هواره شي.
