کریم خُرم: د ایران د شخړې له امله په امریکا کې کورني فشارونه او سیاسي لانجې روانې دي
د تېر جمهوري نظام پرمهال د اطلاعاتو او کلتور وزیر عبدالکریم خُرم وایي، چې په امریکا کې د ایران پر ضد د جګړې او سیاستونو له امله سخت کورني فشارونه او سیاسي لانجې روانې دي. د هغه په وینا؛ پر ایران تر برید وړاندې د امریکا ولسمشر ډونالډ ټرمپ د «اپسټین قضیې» له امله تر فشار لاندې و.
هغه زیاتوي، له ایران سره تر اوربند وروسته یو ځل بیا د اپسټین د رسوايۍ موضوع راپورته شوې چې دا ځل یې د ټرمپ د کورنۍ په اړه هم بحثونه راپارولي دي. خُرم د «نیویارک ټایمز» د یوه راپور په حواله ویلي، چې د ایران پر ضد د جګړې د پرېکړې په اړه یوه مهمه ناسته شوې وه.
د یاد راپور له مخې؛ «بنیامین نتنیاهو د فبرورۍ په میاشت کې هغه مهال چې د ټرمپ مرستیال په اذربایجان کې په سفر بوخت و، سپینې ماڼۍ ته تللی و او د موساد له مشر سره په یوه کوچنۍ غونډه کې یې ټرمپ دې ته قانع کړ چې پر ایران د برید مناسب وخت دی؛ حال دا چې د ټرمپ ځینې نږدې همکاران له دې پرېکړې سره موافق نه وو».
هغه وایي، په راپور کې دا هم ویل شوي چې په امریکا کې د ټرمپ د رواني روغتیا موضوع هم تر پخوا ډېره تر بحث لاندې راغلې ده. کریم خُرم زیاته کړې:« ښايي د ایران پر ضد د جګړې د ناکامۍ پړه تر ډېره د ډونالډ ټرمپ پر غاړه واوړي او د اپسټین قضیه او د امریکايي چارواکو د بلک مېل کېدو ادعاوې د جګړې د پیل له مهمو لاملونو څخه وي».
هغه ټینګار کړی، چې اسراییل له اوسني اوربند سره مخالف دی او د لبنان د جګړې، د ځینو پېښو او د اپسټین د قضیې د بیا راپورته کولو له لارې غواړي امریکا په جګړه کې پاتې شي. هغه دارنګه زیاتوي، چې په امریکا کې په ټولییز ډول او د ټرمپ د پلویانو (MAGA) ترمنځ د اسراییل پر وړاندې نارضایتي او ان کرکه مخ په زیاتېدو ده.
