د هواپوهنې اداره: ۲۶ ولایتونو کې د باران، تالندې، سېلیو او سېلابونو راوتو اټکل شوی
د طالبانو د هواپوهنې ادارې خبر ورکړی، چې نن (د وري ۲۱مه) په ۲۶ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل شوی دی.
د طالبانو د هواپوهنې ادارې خبر ورکړی، چې نن (د وري ۲۱مه) په ۲۶ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل شوی دی.
دغه ادارې د یوې خبرپاڼې په خپرولو سره ویلي، چې په فاریاب، سرپل، بادغیس، هرات، فراه، هلمند، غور، دایکنډي، روزګان، کندهار، زابل، غزني، دایکنډي، بامیان، میدان وردګ، لوګر، پکتیا، خوست، پکتیکا، ننګرهار، لغمان، پنجشېر، کپیسا، پروان، بغلان، سمنګان او تخار ولایتونو لپاره دغه وړاندوینه شوې ده.
د خبرپاڼې له مخې؛ په بېلابېلو سیمو کې د باران کچه ( له ۱۰ تر ۴۰) ملي مترو پورې اټکل شوې ده.
خبرپاڼه کاږي، په لوېدیځو، سویلي او مرکزي ولایتونو کې د تېزو بادونو اټکل هم شوی، چې په بېلابېلو برخو کې یې د چټکوالي کچه په یوه ساعت کې (له ۵۰ تر ۷۵ کیلو مټرو) اټکل شوې ده.
له بل پلوه د طالبانو تر کنټرول لاندې له پېښو سره د مبارزې او چمتووالي ادارې ویاند محمد یوسف حماد وایي، چې په تېرو ۱۴ ورځو کې په بېلابېلو ولایتونو کې د بارانونو، واورو، سېلابونو، زلزلې، د کورونو چتونو پرېوتو او غره ښوېېدو له امله ۱۵۷ کسان مړه، ۲۲۹ ټپیان او ۹ کسان لادرکه شوي دي.
