د پاکستان لومړي وزیر خپل برېتانوي سیال ته د رسمي سفر بلنه ورکړه
د پاکستان لومړي وزیر شهباز شریف له خپل برېتانوي سیال سره په ټېلیفوني خبرو کې هغه ته بلنه ورکړه، چې پاکستان ته سفر وکړي. د برېتانیا لومړي په دې خبرو کې د ایران او امریکا ترمنځ د اوربند د رامنځته کېدو او د خبرو د بیا پیل په برخه کې د پاکستان د ډیپلوماټیکو هڅو ستاینه کړې ده.
د پاکستان د لومړي وزیر دفتر د جمعې په ماخوستن (د وري ۲۱مه) د یوې خبرپاڼې په خپرولو سره ویلي، شهباز شریف په دې ټېلیفوني خبرو کې د سیمې د سولې او ثبات لپاره د پاکستان پر ژمنتیا له ټینګار سربېره د هغو ګډو اعلامیو هرکلی کړی، چې د برېتانیا په ګډون د اروپا او نړۍ مشرانو د پاکستان د سولې د نوښتونو په ملاتړ خپرې کړې دي.
دواړو مشرانو ټینګار کړی، چې د اوربند دوام باید یقیني شي او په سیمه کې د تلپاتې سولې او ثبات لپاره لازم شرایط برابر شي.
د دغو خبرو په پای کې شهباز شریف د برېتانیا لومړي وزیر ته رسمي بلنه ورکړې چې پاکستان ته سفر وکړي.
