د ایران او امریکا ترمنځ خبرې؛ په اسلاماباد کې تر ۱۰زره ډېر امنیتي ځواکونه ځای پرځای شوي
په پاکستان کې د ایران او امریکا ترمنځ د خبرو اترو تر مخه ډان ورځپاڼې په اسلاماباد کې د پوځ تر څار لاندې د ځانګړو امنیتي تابیاوو په اړه راپور ورکړی. راپور زياتوي، چې د امنیت د ټینګښت لپاره په اسلاماباد کې تر ۱۰زره ډېر ځواکونه ځای پرځای شوي دي.
د ډاڼ ورځپاڼې په راپور کې راغلي، چې د پاکستان په پلازمېنه کې د امنیتي تدابیرو تر ټولو لوړه کچه یا «رېډ الرټ» اعلان شوی دی. د ورکړل شویو معلوماتو له مخې؛ ځانګړي امنیتي ترتیبات د پوځ تر څار لاندې، د رېنجرز ځواکونو، د اسلاماباد او پنجاب پولیسو په همکارۍ عملي کېږي.
د پاکستان په پلازمېنه کې د ایران او امریکا ترمنځ د سولې خبرو اترو د امنیت ساتلو لپاره په اسلاماباد او راولپنډۍ ښارونو کې د دوو ورځو لپاره عمومي رخصتي هم اعلان شوې ده. د اسلاماباد ځایي چاروکو په وینا؛ د دغه ښار مهمو سیمو ته ورغلې ټولې لارې به په بشپړ ډول د تګراتګ لپاره تړلې وي او یوازې چارواکو او محدود شمېر کسانو ته د تګراتګ اجازه ورکول کېږي.
له دې سره د پاکستان ټولې فدرالي ادارې به د پنجشنبې او جمعې په ورځ تړلې وي او کارکوونکي به يې له کوره کار کوي.
