د روسیې یوې پوځي محکمې د دغه هېواد د دفاع وزارت پخوانی مرستیال، پاول پوپوف د مالي فساد او درغلیو په تور په ۱۹ کاله تنفیذي بند محکوم کړ. نوموړی تورن دی چې د یوه پوځي پارک د جوړولو له بودیجې او امکاناتو څخه یې شخصي ګټه پورته کړې ده.
د روسیې دولتي خبري اژانس د جمعې په ورځ، د وري ۲۱مه راپور ورکړ، چې ۶۹ کلن پاول پوپوف د محکمې له لوري مجرم پېژندل شوی، خو نوموړي لګول شوي تورونه رد کړي دي. پوپوف د ۲۰۲۴ کال په دوبي کې مسکو ته نږدې د یوه پوځي پارک د جوړولو په تړاو د درغلیو په تور په «اربات» سیمه کې ونیول شو.
پلټونکو موندلې چې پاول پوپوف له ۲۰۲۱ کال راهیسې له یاد پارک څخه خپل کلي ته ساختماني مواد لېږدول او له دولتي امکاناتو یې په شخصي ودانیو کې ګټه اخیسته.
د یادونې وړ ده چې د روسیې د دفاع وزارت یو بل پخوانی لوړپوړی چارواکی، ولادیمیر شیستروف هم په تېر جولای میاشت کې په ورته قضیه کې په شپږ کاله بند محکوم شوی و.
