د پاکستان تحریک انصاف ګوند په خیبر پښتونخوا کې پراخه ولسي غونډه جوړوي
د پاکستان تحریک انصاف ګوند د روانې میاشتې په پای کې په خیبر پښتونخوا کې یوه پراخه ولسي غونډه جوړوي. تر دې وړاندې د یاد ګوند بنسټګر عمران خان په لارښوونه (د وري په ۲۰مه) په راولپنډۍ کې کېدونکې ولسي غونډه په اسلاماباد کې د ایران او امریکا ترمنځ د سولې خبرو له امله وځنډېده.
عمران خان په دې اړه ويلي، چې د پاکستان د سولې د هڅو ملاتړ باید وشي. د خیبر پښتونخوا سر وزیر سهیل اپریدي په دې اړه یوې خبري ناستې ته د وینا پرمهال د عمران خان پرېکړه وستایله او زیاته یې کړه، چې د ټولو ظلمونو او زور زیاتي برسېره عمران خان د پاکستان د پت لپاره پراخه ولسي غونډه وځنډوله.
سهیل اپریدي وويل، چې د غونډې نېټه به د عمران خان له لارښوونې سره سم په صلاح مشوره په راتلونکو دوو ورځو کې وټاکل شي. هغه وویل، چې د عمران خان د سترګې ستونزه جدي ده او په سمه توګه یې درملنه نه کېږي.
هغه وایي، د عمران خان درملنه د هغه د خویندو په غوښتنه باید په الشفا روغتون کې ترسره شي. یاده دې وي، چې تېره میاشت سهیل اپریدي په پېښور کې له زندانه د عمران خان د خلاصون لپاره د یوه ځانګړي ځواک جوړولو لپاره د نوم لیکنې کمپاین پیل کړ.
