د هند د بهرنیو چارو وزارت په لبنان کې د وروستیو بریدونو له امله د ملکي وګړو پر مرګژوبلې ژوره اندېښنه ښودلې او د نړۍوالو قوانینو پر مراعاتولو یې ټینګار کړی دی. هند په خپله رسمي اعلامیه کې د کوم هېواد نوم نه دی اخیستی.
د هند د بهرنیو چارو وزارت د جمعې په ورځ، په یوه اعلامیه کې، پرته له دې چې د اسراییل نوم واخلي، په لبنان کې د وروستیو بریدونو له امله د ملکي وګړو پر مرګژوبله اندېښنه ښودلې ده.
په اعلامیه کې د نړۍوالو قوانینو پر مراعات او د هېوادونو د حاکمیت او ځمکنۍ بشپړتیا ته پر درناوی ټینګار شوی دی.
د راپورونو له مخې، په لبنان باندې د اسراییل په دوه ورځنیو بریدونو کې له ۲۵۰ څخه ډېر کسان وژل شوي او له ۱۰۰۰ څخه ډېر نور ټپیان دي. دغو پېښو په سیمه کې د جګړې د پراخېدو په اړه سختې اندېښنې راپارولې دي.
