نیویارکټایمز ورځپاڼې د امریکایي چارواکو په حواله راپور ورکړی، چې ایران په هرمز تنګي کې د ټولو اېښودل شویو ماینونو په موندلو او پاکولو کې د پاتې راتلو له امله نهشي کولی دغه ستراتیژیکه لاره د بېړیو د پراخ تګراتګ لپاره په چټکۍ سره پرانیزي.
د دغه چارواکو په وینا؛ تهران تېره میاشت له امریکا او اسراییل سره د نښتې له پیل وروسته د کوچنیو کښتیو پرمټ په هرمز تنګي کې ماینونه کېښودل؛ هغه اقدام چې د توغندیزو او بېپیلوټه الوتکو له ګواښونو سره یوځای د تېلو د لېږدوونکو بېړیو تګراتګ یې په بېساري ډول کم کړ او د انرژۍ بیې یې هم لوړې کړې.
یادې ورځپاڼې همداراز لیکلي، ایران هغو بېړیو ته چې محصول ورکوي یوه محدوده لاره پرانیستې پرېښې ده؛ خو د ماینونو د نامنظمې خپرېدا او د هغوی د کره ځایونو د نه ثبت له امله اوس تهران د هغوی په پېژندلو او راټولولو کې له ستونزو سره مخ دی.
نیویارکټایمز زیاته کړې، دغه مسله کولی شي د تهران او واشنګټن ترمنځ راتلونکې خبرې اترې لا پېچلې کړي؛ ځکه ډونالډ ټرمپ د هرمز تنګي «بشپړ، سملاسي او خوندي» پرانیستل د اوربند شرط اعلان کړی دی.
