د طالبانو د کډوالو او بېرته راستنېدونکو چارو وزارت خبر ورکړی، چې په تېر ۱۴۰۴لمریز کال کې د هېواد په ۳۴ ولایتونو کې له ۵۲۲زره او ۵۴ راستنو شویو، بېځایه شویو کورنیو او کوربه ټولنو سره مرستې شوې دي.
دغه وزارت د شنبې په ورځ (د وري ۲۲مه) د یوې خبرپاڼې په خپرولو سره ویلي، چې له یاد شمېر کورنیو سره د مرستو کچه ۳مېلیارده، ۳۵۴ مېلیونه، ۱۴زره او ۴۰۶ افغانیو ته رسېږي.
د خبرپاڼې لهمخې؛ په دغه مرستو کې نغدي پیسې، خوراکي او غیرخوراکي توکي او د هغوی د نورو لومړنیو اړتیاوو د پوره کولو لپاره ځانګړې شوې مرستې شاملې وې. د طالبانو د کډوالو او بېرته راستنېدونکو چارو وزارت په خبرپاڼه کې راغلي، چې دغه مرستې په ټول هېواد کې د یاد شمېر کورنیو د اقتصادي ستونزو د کمولو، ملاتړ او د وضعیت د ښه کولو په موخه لګول شوې دي.
یاد وزارت وایي، چې له کورنیو او نړۍوالو شریکانو سره په همغږۍ هڅه کوي دغه پروګرامونه پراخ کړي؛ څو په هېواد کې د کډوالو بنسټیزې اړتیاوې په ښه توګه پوره شي.
طالبان په داسې حال کې د یادې اندازې مرستو خبر ورکوي، چې پر افغانستان د دوی تر بیا واکمنېدو وروسته زرګونه کورنۍ له پراخو اقتصادي ستونزو سره مخ دي او له تېرو دوو کلونو راهیسې د ایران او پاکستان په ګډون د سیمې له هېوادونو د زرګونه افغانانو د جبري ستنولو له امله د خلکو اقتصادي وضعیت لاپسې کړکېچن شوی دی.
څه موده وړاندې د ملګرو ملتونو د بشري چارو د همغږۍ دفتر (اوچا) ویلي و، د طبیعي پېښو زیاتوالی، اقتصادي ستونزې او د کډوالو جبري ستنېدنه د دې لامل شوې چې په ۲۰۲۶کال کې به شاوخوا ۴.۲ مېلیونه افغانان په خپل هېواد کې بېړنیو مرستو ته اړتیا ولري.
اوچا ویلي و، چې مرستندویه بنسټونه غواړي په ۲۰۲۶کال کې ۸۸۱زره اړمنو کسانو ته سرپناه او غېرخوراکي توکي برابر کړي؛ خو د دغه هدف لپاره شاوخوا ۱۶۰.۳ مېلیون ډالرو ته اړتیا ده.
