والسټریټ ژورنال ورځپاڼې لیکلي، د امریکا استخباراتي ارزونې ښيي چې ایران لاهم زرګونه بالستیک توغندي لري او د امریکا او اسراییل له وروستیو بریدونو سره، سره د دې وړتیا لري چې تر ځمکې لاندې تاسیساتو کې خوندي شوي وېشتګرونه بیا فعال کړي.
دغه ورځپاڼې د همدې ارزونو په حواله زیاته کړې، چې د ایران توغندیز ځواک تر ډېره حده کمزوری شوی؛ خو لاهم فعال دی او د هغو ۲۵۰۰ بالستیک توغندیو له ډلې چې له جګړې وړاندې یې لرل تر زرو ډېر منځني واټن وېشتونکي توغندي یې لاهم په زېرمتونونو کې شته.
والسټریټ ژورنال د دغه امریکایي چارواکو په حواله لیکلي، چې د ایران له نیمايي ډېر وېشتګرونه ویجاړ شوي، زیانمن شوي او یا هم د ځمکې لاندې تاسیساتو کې تر خاورو لاندې شوي دي. د دوی په خبره؛ له دغه وېشتګرونو څخه ډېری یې د ترمیم وړ دي او یا هم له پیاوړو غرنیو کمپلکسونو څخه بېرته را اېستل کېدای شي.
