د طالبانو ستره محکمه وايي، په کندوز او غزني کې یې ۳ کسان په عام محضر کې په دُرو وهلي. د دغې محکمې په وینا، یاد کسان د اخلاقي فساد او غلا په تور له ۲۵ تر ۳۰ دُرو وهل شوي او همداراز له یو تر درېیو کلونو په بند هم محکوم شوي دي.
د طالبانو سترې محکمې د یکشنبې په ورځ (د وري ۲۳مه) د یوې خبرپاڼې په خپرولو سره ویلي، د کندز د قلعهزال ولسوالۍ ابتداییه محکمې ۲ کسان د اخلاقي فساد په تړاو پر سزاوو محکوم کړي او د یادې محکمې د پرېکړې لهمخې یاد کسان نن (یکشنبه د وري ۲۳مه) یو یې ۲۵ دُرې او بل یې ۳۰ دُرې ووهل شول. له یادو کسانو یو یې په ۳ کاله او بل یې په یونیم کال بند هم محکوم شوي دي.
له دې سره سم، د غزني د ګيلان ولسوالۍ لپاره د طالبانو د ابتداییه محکمې د پرېکړې پر بنسټ هم يو کس د غلا په تړاو ۳۰ دُرې وهل شوی او همداراز پر یوه کال بند هم محکوم شوی دی.
د طالبانو د سترې محکمې په وینا، یادې پرېکړې د دوی د سترې محکمې له تاییدۍ وروسته تطبیق شوې دي.
دا په داسې حال کې ده، چې د ملګرو ملتونو کارپوهانو په دې وروستیو کې په افغانستان کې د طالبانو لهخوا په عام محضر کې د قضایي بدني سزاګانو ورکړه، چې په وینا یې تش په نامه د «اخلاقي جرمونو» لپاره ورکول کېږي، د بشري حقونو له نړۍوالو قوانینو سرغړونه بللې ده.
