د طالبانو سترې محکمې خبر ورکړی، چې د ننګرهار په دره نور ولسوالۍ کې د دوی لومړنۍ محکمې یو کس ته د تښتونې او زنا په تور یو نیم کال د بند سزا اورولې او په دُرو هم وهل شوی دی. همدا راز بادغیس ولایت کې هم د طالبانو یوې محکمې د اخلاقي فساد په تور یو کس ته ورته سزا ورکړې ده.
طالبانو ویلي چې دواړو کسانو ته په یادو ولایتونو کې د دوی د بېلابېلو ادارې د مسوولینو په حضور کې په دُرو د وهلو سزاوې ورکړل شوي او زندان ته اچول شوي دي. پر کابل واکمنو طالبانو تر دې مخکې هم ورته سزاوې په بېلابېلو ولایتونو کې پلي کړې دي.
د طالبانو د مشر ملا هبت الله له لوري په دې وروستیو کې د جزایي اصولنامې په نوم د خپلې ډلې د محاکمو لپاره یوه کړنلاره هم توشیع کړې ده. د طالبانو په محاکمو کې دغه پلي کېدونکي تګلاره د بشري حقونو نړیوالو سازمانونو او حقوق پوهانو له لوري له سختو غبرګونونو سره مخ شوې ده.
نیوکې دا دي چې په دغه جزایي کړنلاره کې طالبان او ملایان د ټولنې له نورو وګړو غوره ګڼل شوي او ځانګړي جزایي معافیتونه ورکړل شوي دي چې برعکس عامو وګړو ته پهکې بیا درنې سزاوې ټاکل شوې دي.
