د طالبانو ستره محکمه وایي، چې په پکتیا او بادغیس ولایتونو کې یې په دوو جلا قضیو کې درې کسان د بند ترڅنګ په دُرو وهلي. دوی زیاتوي، په پکتیا کې یو کس د قتل د ګواښ په تور په درې کاله بند او ۱۰ دُرې وهل شوی، او په بادغیس کې دوه کسان د روژې د خوړلو په تور ۲۰-۲۰ دُرې وهل شوي.
د خبرپاڼې له مخې، د پکتیا ولایت د ابتدایه محکمې دغه پرېکړه وروسته له هغې عملي شوې چې د طالبانو د سترې محکمې له لوري تاید شوه او د قضايي غړو، امارتي ادارو د مسولینو او یو شمېر عامو خلکو پر وړاندې پر تورن کس تطبیق شوې.
په ورته وخت کې، د بادغیس ولایت د دره بوم ولسوالۍ ابتدایه محکمې د دوو کسانو په اړه د روژې د خوړلو په تور پرېکړه کړې وه، چې هر یو ته دوه میاشتې بند او ۲۰-۲۰ دُرې د وهلو سزا ټاکل شوې وه.
په خبرپاڼه کې راغلي، د سترې محکمې په وینا، دا پرېکړه هم له رسمي تاید وروسته عملي شوې او محکومینو د محکمې له فیصله سره قناعت ښودلی دی.
بل خوا د بشري حقونو بنسټونه وايي، دغه ډول سزاوې له نړۍوالو قوانینو او بنسټیزو بشري حقونو سره په ټکر کې دي او په هېواد کې یې د وېرې فضا خوره کړې ده. ملګرو ملتونو، د بشري حقونو څار سازمان او د بښنې نړۍوال سازمان په وار - وار له طالبانو غوښتي، چې دغه ډول سزاوې ودروي.
د یادولو ده، چې افغانستان د شکنجې پر ضد د کنوانسیون او د مدني او سیاسي حقونو د نړۍوال میثاق غړی دی چې دواړه بدني سزاګانې منع کوي. طالبان بیا دغه چاره د «شریعت» تطبیق بولي.
