په کراچۍ ښار کې طالب کونسل: طالب مشران له پاکستان سره امن او ښو اړیکو ته ژمن دي
کراچي ښار کې د طالبانو کونسل، سید عبدالجبار تخاري، ویلي چې طالب مشران له پاکستان سره د امن او ښو اړیکو غوښتونکي دي او شاوخوا ۹۵سلنه افغانان همدا نظر لري. په داسې حال کې چې پر افغانستان د یاد هېواد له بریدونو وروسته د دغه هېواد پر وړاندې د غیر طالب افغانانو کرکه لا پراخه شوې.
هغه، افغانستان انټرنشنل – پښتو سره په یوې ځانګړې مرکه کې چې تازه له افغانستان څخه خپلې دندې ته راستون شوی و، وویل: «د افغانستان ټول خلک غواړي چې له پاکستان سره امن او ښې اړیکې ولري، او زموږ مشران هم همدې ته ژمن دي.»
نوموړي زیاته کړه، جګړه د هېچا په ګټه نه ده او تل د خلکو پر ژوند ناوړه اغېزې کوي. د هغه په خبره، جګړه کورونه ورانوي، خلک کډوال کوي او اقتصاد ته زیان رسوي، له همدې امله افغان ولس او مشران د تاوتریخوالي د پای ته رسېدو غوښتونکي دي.
هغه وویل، افغانستان او پاکستان اوږدمهاله اړیکې لري او د دواړو هېوادونو ترمنځ مذهبي، سیاسي او سوداګري اړیکې شته. د ده په وینا، ډېری افغانان باور لري چې دواړه هېوادونه نه شي جلا کېدای.
د لارو د تړل کېدو په اړه نوموړي وویل، چې لارې د پاکستان له لوري تړل کېږي او دغه کار یې ستونزې رامنځته کړې دي. هغه ټینګار وکړ چې باید ټولې لارې د سوداګرۍ پر مخ تل پرانستي وي.
تخاري د طالبانو د مشرانو له دریځ څخه هم یادونه وکړه او ویې ویل چې د اقتصادي چارو لپاره د رییس الوزرا مرستیال ملا عبدالغني برادر هم ټینګار کړی چې که څه هم کله ناکله اختلافات او نښتې رامنځته کېږي، خو باید د سوداګرۍ لارې هېڅکله ونه تړل شي، ځکه دا کار دواړو غاړو ته زیان رسوي.
هغه په پای کې وویل چې د پاکستان حکومت دا دریځ نه مني او کله چې وغواړي لارې پرانیزي او کله چې یې وغواړي تړي یې، خو د افغان لوري غوښتنه دا ده چې سوداګریزې لارې دې تل پرانستې وي.
