پاکستانی چارواکی: هیله لرو ایران له امریکا سره خبرو کې ګډون وکړي
یو لوړپوړي پاکستاني چارواکي ویلي، چې اسلاماباد باور لري چې ایران به له امریکا سره په راتلونکو خبرو کې ګډون وکړي. دا په داسې حال کې ده چې د متحده ایالاتو د اوربند ضربالاجل نږدې کېدو سره ډیپلوماتیکې هڅې چټکې شوې دي.
د رویټرز خبري اژانس د راپور له مخې، د پاکستان حکومت یو لوړپوړي چارواکي ویلي چې اسلاماباد هڅه کوي ایران وهڅوي څو له امریکا سره د خبرو مېز ته حاضر شي.
دغه چارواکي د نوم نه ښودلو په شرط ویلي: «له ایران څخه مو مثبت سیګنال ترلاسه کړی، وضعیت لا هم بدلېدونکی دی، خو موږ هڅه کوو چې هغوی د خبرو د پیل پر مهال یا یوه ورځ وروسته دلته حاضر وي.»
نوموړي زیاته کړې چې پاکستان په فعاله توګه له تهران او واشنګټن سره ډیپلوماټیک تماسونه لري، په داسې حال کې چې د امریکا د ولسمشر ډونالډ ټرمپ له خوا د اوربند ټاکل شوی ضربالاجل نږدې کېږي.
راپور زیاتوي چې دا هڅې د سیمې د کړکېچ د کمولو او د احتمالي ډیپلوماټیک حل د موندلو په موخه ترسره کېږي.
