د بلوچستان ایالت په خضدار او مستونګ ولسوالیو کې په دوو جلا پېښو کې درې پاکستاني پولیس وژل شوي او ۷ نور ټپیان دي. په لومړۍ پېښه کې د خضدار ولسوالۍ په باغبانه باجوي سیمه کې وسلهوالو پر پولیسو ډزې کړې، چې له امله یې د یوې ښځینه پولیسې په ګډون ۲ پاکستاني پولیس وژل شوي او یو ټپي دی.
همدارنګه د یاد ایالت د مستونګ ولسوالۍ په دښت سیمه کې د یو لړ عملیاتو پرمهال یو پاکستانی سرتېری وژل شوی او شپږ نور ټپیان دي. د راپورونو له مخې؛ په دغه نښته کې یو وسلهوال هم وژل شوی دی.
ډان ورځپاڼې د پاکستاني چارواکو په حواله راپور ورکړی، چې په لنډي کوتل کې د افغان کډوالو د لېږد په لنډمهاله پنډغالو کې د ستنېدو لړۍ چټکه شوې ده. د دوی د معلوماتو له مخې؛ هره ورځ ۴زره او ۵۰۰ افغان کډوال د ستنېدو په موخه ثبتېږي.
د حمزه بابا لنډمهاله پنډغالي چارواکو ویلي، چې د مارچ میاشتې له ۳۱مې نېټې د ستنېدونکو لپاره د تورخم لارې تر پرانیستلو وروسته د افغان کډوالو د ستنېدو شمېر زیات شوی. دوی ویلي، چې دوه ورځې وړاندې په یوه ورځ تر ټولو ډېر ۶زره افغان کډوال افغانستان ته ستانه شوي دي.
چارواکو ویلي، چې دامهال په دغه پنډغالي کې د کارکوونکو شمېر، د ثبت وسایل او نورې اسانتیاوې زیاتې شوې دي. د ځايي چارواکو په خبره؛ د لنډي کوتل اوسېدونکو په ځانګړي ډول شینوارو له افغان کډوالو سره مرستې کړې او افغان کورنیو ته یې خواړه، درمل، جامې او د اوسېدو ځایونه برابر کړي دي.
خو په دغه لنډمهاله پنډغالو کې بیا افغان کډوال د اسانتیاوو له نشتوالي په ځانګړي ډول د برېښنا او څښاک اوبو د نشتوالي په اړه شکایتونه کوي. د یادې سیمې یو فعال قاضي نظیم ګل ویلي: «د یادو افغان کورنیو ډېره برخه ځايي خلکو پر غاړه اخیستې. هغوی نه یوازې دوی ته اړین توکي برابر کړي؛ بلکې ګڼ شمېر افغانانو په ځانګړې توګه ښځو، ماشومانو او ناروغانو ته یې په خپلو کورونو کې ځای هم ورکړی دی».
په اسلاماباد او راولپنډۍ کې یو شمېر پوهنتونونو خپل تدرس په انلاین بڼه کولو او د ازموینو د ځنډولو اعلان کړی دی. دا پرېکړه د ایران او متحده ایالاتو ترمنځ د احتمالي مذاکراتو د دوهم پړاو د ترسره کېدو په تړاو شوې ده.
د پاکستاني رسنیو د راپورونو له مخې، تمه کېږي چې د دغو خبرو دوهم پړاو هم په اسلاماباد کې ترسره شي. د امریکا ولسمشر ډونالډ ټرمپ ویلي چې د دوی استازي به ژر پاکستان ته ورسېږي.
په اسلام اباد کې نړیوال اسلامي پوهنتون اعلان کړی چې د اپرېل له ۲۰تر ۲۴پورې به ټولګي انلاین وي او منځنۍ ازموینې یې ځنډولې دي.
همدارنګه، پیر مهر علي شاه د کرنې اریډ پوهنتون ویلي چې د اپرېل له ۱۸تر ۲۶پورې به ټولګي انلاین وي او اصلي ودانۍ به یې د یوې اوونۍ لپاره تړلی وي. زدهکوونکو ته سپارښتنه شوې چې له لیلیو ووځي او کارکوونکي به خپلې دندې له کوره ترسره کوي.
بل خوا د راولپنډي طبي پوهنتون او کامسیټس پوهنتون هم ازموینې ځنډولې دي،خپل ټولګي یې انلاین کړي او خپلې منځنۍ ازموینې یې ځنډولي دي.
د «ایکسپرېس ټریبیون» ورځپاڼې د راپور له مخې، په راولپنډۍ کې د دغو احتمالي مذاکراتو له امله سخت امنیتي تدابیر نیول شوي دي. راپور وايي چې له ۱۰زرو څخه زیات پولیس ګمارل شوي او له ۶۰۰زیاتې تلاشي پوستې جوړې شوې دي.
همدارنګه ویل شوي چې په راولپنډۍ کې د هلکانو او نجونو لیلیې تر بل امر پورې تړل شوې دي.
تر اوسه په اسلاماباد کې د مذاکراتو د دوهم پړاو دقیق وخت په رسمي ډول نه دی اعلان شوی.
د جمعيت علما اسلام ګوند مشر، مولانا فضل الرحمن ویلي، سره له دې چې پاکستان د ایران او متحده ایالاتو ترمنځ د منځګړیتوب هڅې کوي، خو په خپله په کور دننه له جدي سیاسي او اقتصادي ستونزو سره مخ دی.
هغه په لاهور ښار کې یوې غونډې ته د وینا پرمهال وویل،چې د پاکستان ختیځې او لوېدیځې پولې له هند او افغانستان سره تړلې دي، چې دغه کار د سوداګرۍ پر لارو منفي اغېز کړی او اقتصادي فشارونه یې زیات کړي دي.
نوموړي ټینګار وکړ چې د دې وضعیت له امله نه یوازې اقتصادي ستونزې ډېرې شوې، بلکې د چین په ګډون ځینې مهم شریکان هم له پاکستان څخه ناخوښ دي او پانګونه یې کمه کړې ده. د هغه په وینا، له ایران سره اړیکې هم روښانه نه دي.
مولانا فضلالرحمن د پاکستان د اقتصادي راتلونکې په اړه اندېښنه وښوده او ویې ویل چې خلک له لوړې بیو سره مخ اود هُرمز تنګي د وضعیت له امله د سون توکوبیې ناڅاپي لوړې شوې دي.
هغه وویل چې که څه هم د ګرانۍ پر ضد اعلان شوي لاریونونه ځنډول شوي، خو لغوه شوي نه دي او کېدای شي بېرته پیل شي.
فضلالرحمن د پاکستان له حکومت څخه وغوښتل چې د هېواد د سیاسي او اداري نظام اصلاح ته جدي پاملرنه وکړي، ځکه د هغه په باور، اوسنی وضعیت د پالیسۍ د کمزورۍ څرګندونه کوي.
د امریکا په لویزیانا ایالت کې په یوه خونړۍ پېښه کې لږ تر لږه اته ماشومان چې عمرونه یې له یو تر ۱۴کلونو پورې وو، د ډزو له امله وژل شوي دي.
د نیویارک ټایمز د راپور له مخې، دا پېښه د یکشنبې په سهار د محلي وخت له مخې د شریوپورټ ښار په یوه سیمه کې رامنځته شوې ده.
پولیس وایي چې په دې پېښه کې ټولټال ۱۰کسان په ډزو لګېدلي، خو د دوو کسانو وضعیت لا هم نه دی روښانه.
د پولیسو په وینا، هغه وسلهوال چې د ډزو مسول و، د پولیسو د تعقیب پر مهال وژل شوی دی.
د کریس بورډلون په نوم د شریوپورت د پولیسو یو چارواکي ویلي چې دا پېښه «کورنۍ شخړې» پورې تړلې ده.
نوموړي زیاته کړه چې پولیس د سهار شاوخوا ۶بجې د ۷۹مې لوېدیځې کوڅې له ۳۰۰بلاک څخه د ډزو راپور ته ورسېدل.
د پولیسو په وینا، ډزې د دوو کورنیو ترمنځ شوې دي او د «هریسن سړک» په یوه بله کور کې هم د جرم نښې موندل شوې دي.
چارواکي وایي، بریدګر وروسته په زور یو موټر تښتولی و، خو پولیسو یې تعقیب کړی او په نښته کې وژل شوی دی.
پولیسو ویلي چې همدا کس یوازینی بریدګر و او په هغه کورونو کې چې پېښه پکې شوې، د هغه خپل لمسیان هم موجود وو، چې دا پېښه یې لا هم دردوونکې کړې ده.
د برېتانیا پولیسو ویلي، چې په لندن کې پر یهودي مرکزونو د بریدونو په پېښو کې د ایران اسلامي جمهوریت احتمالي لاس لرل څېړي. د یهودانو یوه مذهبي مشر دا ډول پېښې د یهودي ټولنې پر وړاندې یو منظم او خطرناک کمپاین بللی دی.
د راپورونو لهمخې، په وروستی اونۍ کې په لندن کې د یهودانو پر مرکزونو درې بریدونه شوي دي.
د برېتانیا ترهګرۍ ضد پولیسو ویلي، چې دوی د یادو بریدونو ریښې لټوي او هڅه کوي، معلومه کړي چې دا بریدونه د ایران لهخوا تنظیم شویو فعالیتونو برخه دي او که نه.
د برېتانیا د ترهګرۍ پولیسو جګپوړي افسر ویکي ایونز رسنیو ته ویلي:« موږ په بریتانیا کې د ایران له احتمالي ګواښونو خبر یو. داسې راپورونه شته چې دا بریدونه له ایران سره تړلې یوې ډلې کړي او موږ به د خپلو پلټنو په ترڅ کې دا پوښتنه په جدي ډول و څېړو».
د یهودانو پر مرکزونو بریدونو ته د برېتانیا لومړي وزیر کېیر سټارمر هم سخت غبرګون ښودلی.
نوموړي پر اېکسپاڼه لیکلي:«پر یهودي ټولنې برید، پر ټولې برېتانیا برید دی».
پر همدغه مهال په په برېتانیا کې د یهودانو مذهبي مشر ایفریم میرویس ویلي، چې د یهودانو د ډارولو لپاره یوه بزدلانه هڅه پیل شوې ده.
تر اوسه په لندن کې د یهودانو پر مرکزونو د بریدونو او او اچونې په پېښو کې د ځاني زیان په اړه جزییات نه دي ورکړل شوي، خو یوې ایران پلوې ډلې د دغو بریدونو مسوولیت منلی او وايي، په ټوله اروپا کې پر امریکايي او اسراییلي مرکزونو د بریدونو تر شا ولاړ دي.