د افغانستان د مشرانو جرګې پخواني رییس فضل هادي مسلمیار ویلي، ډیورنډ یوه فرضي او کرغېړنه کرښه ده چې افغان ملت هېڅکله نه ده منلې او نه به یې ومني. مسلمیار ټینګار کړی، چې د ډیورنډ کرښې په اړه هر ډول پرېکړه او دریځ یوازې د افغانستان د ټول ملت پورې اړه لري.
د هغه په وینا، دا موضوع د افرادو یا اشخاصو په شخصي نظرونو نه رسمي کېږي او نه هم ملت دا کرښه د یوې رسمي پولې په توګه پېژني. نوموړي زیاته کړه چې د ډیورنډ کرغېړنې کرښې له امله پښتانه سره جلا شوي او دغه کرښه د منلو نه ده.
مسلمیار وویل: «کوم خلک یا کوم فرد چې ددې کرغېړنې کرښې په اړه شخصي او فردي څرګندونې کوي، له تاریخ ناخبره دي او دا ډول څرګندونې یوازې شخصي نظرونه دي چې ملت یې نه مني».
د هغه په خبره، د ډیورنډ کرښې په اړه هر ډول رسمي دریځ باید د ملت له لوري واخیستل شي او د افرادو شخصي نظرونه هېڅ ډول رسمي ارزښت نه لري. مسلمیار پر افغان ملت د یووالي او د تاریخي حقونو د ساتنې ټینګار وکړ.
