د بدن جوړونې افغان لوبغاړي ابوذر فیضي د اسټرالیا د «PCA» په ازاده سیالیو کې دوه د سرو زرو مډالونه وګټل. هغه دارنګه وتوانېده، چې د دغه سیالیو د «اتلانو اتل» لقب خپل کړي او خپل مسلکي کارت هم ترلاسه کړي.
فیضي په خپل شخصي پاڼه کې په یوه پیغام کې لیکلي: «دا هم د نننیو ملي سیالیو پایله؛ د دوو سرو زرو مډالونو په ګټلو سره د اتلانو اتل شوم او خپل مسلکي کارت مې هم ترلاسه کړ».
دغه سیالۍ د اسټرالیا په وېکتوریا ایالت کې ترسره شوې او د سیالیو تنظیموونکو هم په یوه پیغام کې د ابوذر فیضي د بریا مبارکي ورکړې او ټینګار یې کړی، چې نوموړی د یادې برخې نوی اتل پېژندل شوی دی.
ابوذر فیضي تېر کال هم هڅه کړې وه، چې تر علي بلال وروسته د مسټر المپیا سیالیو ته لار ومومي؛ خو د امریکا پولیسو هغه ته دغه هېواد ته د ننوتلو اجازه ورنه کړه او په یادو سیالیو کې یې د ګډون مخه ونیول شوه.
