د هلمند ولایت د ملکه ثریا روغتون یو شمېر ښځینه کارکوونکو افغانستان انټرنشنل ته ویلي چې د جمهوري نظام د وروستیو اتو میاشتو معاشونه یې تر اوسه نه دي ورکړل شوي. دغه کارکوونکې وايي، پخوا یې معاش ۱۸ زره افغانۍ و، خو اوس ۷ زره افغانۍ شوی او هغه هم درې میاشتې کیږي چې نه دی ورکړل شوی.
دوی وایي چې د جګړو په سختو شرایطو کې یې هم خپلو دندو ته دوام ورکړی، شپه او ورځ یې کار کړی او د خپلو دندو په ترسره کولو کې یې ډېرې قربانۍ ورکړې دي.
یادو کارکوونکو زیاته کړې چې څو ځله یې خپل اسناد او غوښتنې اړوندو وزارتونو ته سپارلي، خو تر اوسه یې حق نه دی ورکړل شوی.
د دوی په وینا، مخکې معاشونه د انکشافي بودجې له لارې ورکول کېدل، خو اوس رسمي سیستم ته انتقال شوي، مګر له دې سره سره یې ستونزې لا هم نه دي حل شوي.
دغه کارکوونکي شکایت کوي، چې پخوا یې معاش ۱۸ زره افغانۍ و، خو اوس ۷ زره افغانۍ شوی او هغه هم له تېرو درې میاشتو راهیسې نه دی ورکړل شوی.
یادې ښځینه کارکوونکي زیاتوي چې د هېواد په نورو برخو کې د مالیاتو او صفایي فیسونو په نوم له خلکو څخه د کلونو کلونو پیسې اخیستل کېږي، خو د روغتیايي کارکوونکو حقونه نه ورکول کېږي.
