د افغانستان د تېر جمهوري نظام د بهرنیو چارو وزیر محمد حنیف اتمر وایي، د خپل ځان د ارادی حق د نړیوال قانون بنسټیز اصل دی. هغه زیاته کړې، چې په مهمو ملي مسایلو، په ځانګړي ډول د ډیورنډ کرښې په قضیه کې، د افغانانو اراده له پامه غورځول شوې ده.
هغه پر ایکس خواله رسنۍ کې لیکلي، چې د خپل ځان د ارادې حق د معاصر بشري تمدن له مهمو لاسته راوړنو څخه دی، چې د حکومتونو او سیاسي نظامونو مشروعیت د ملتونو له ارادې سره تړي. د هغه په وینا، دا اصل د افغانستان په اساسي قانون کې هم ځای لري او ملي حاکمیت یوازې د خلکو حق ګڼي.
هغه زیاته کړې: «د تاریخ په بېلابېلو پړاوونو کې، په ځانګړي ډول د تپل شوې ډیورنډ کرښې په قضیه کې، د ملت اراده له پامه غورځول شوې ده.»
د نوموړي په خبره، د ځینو سیاسي ډلو دریځونه نه یوازې له تاریخي واقعیتونو سره سمون نه لري، بلکې د افغانستان د خلکو له غوښتنو او احساساتو څخه هم واټن لري.
اتمر ټینګار کړی چې هېڅ سیاسي مصلحت نه شي کولی د خلکو له خپلواکۍ او د خپلې خاورې پر سر د حاکمیت حق ترې واخلي. هغه ویلي: «د لویو ملي موضوعاتو په اړه د خلکو د ارادې او غوښتنو نادیده نیول د منلو وړ نه دي او د ملي حاکمیت له اصولو سره په ټکر کې دي.»
