ډونالډ ټرمپ: هغه وخت پای ته رسېدلی چې کمزورو هېوادونو به موږ ته فشار راکاوه
د امریکا ولسمشر ډونالډ ټرمپ ویلي، چې امریکا نور د هغو پالیسیو تر اغېز لاندې نه ده چې د ده په وینا، د کمزورو حکومتونو له امله دغه هېواد د نورو دولتونو له فشار او ګواښونو سره مخ و. نوموړي ټینګار کړی، چې واشنګټن به د خپلو دښمنانو پر وړاندې کلک دریځ خپلوي.
دا څرګندونې د امریکا د بهرنیو چارو وزارت د فارسي ژبې په رسمي ایکس حساب خپرې شوې، چې پکې د امریکا د ولسمشر له خولې سختې او توندې خبرې نقل شوې دي.
په دغه بیان کې ویل شوي، چې امریکا کلونه د داسې حکومتونو تر اغېز لاندې وه چې «کمزورو هېوادونو ته یې اجازه ورکوله چې پر واشنګټن فشار راوړي او دغه هېواد تر اقتصادي او سیاسي زیانونو ورسوي.»
په راپور کې د امریکا د ولسمشر له قوله راغلي: «هغه ورځې پای ته رسېدلې دي. امریکا د کمزورو او بزدلو کسانو له خوا نه ده جوړه شوې چې د شر په وړاندې شا اړوي یا د خطر پر وړاندې بېحرکته پاتې کېږي.»
هغه زیاته کړې، چې د امریکا بنسټ اېښودونکو نسلونو د هېواد د دښمنانو پر وړاندې روښانه دریځ درلود او «هغوی ته یې ماتې ورکوله او بشپړ یې له منځه وړل.»
دغه څرګندونې په داسې مهال خپرې شوې چې د امریکا د بهرني سیاست په اړه دننه او بهر بېلابېل بحثونه روان دي، او د واشنګټن د راتلونکو دریځونو په اړه اټکلونه هم زیات شوي دي.
