چین د امریکا، فلیپین او جاپان د ګډو پوځي تمرینونو پر ضد خبرداری ورکړی
چین د دوشنبې په ورځ د امریکا، فلیپین او جاپان د ګډو پوځي تمرینونو په تړاو خبرداری ورکړ چې سیمه ییز باور ته له زیان رسوونکو پوځي همکاریو باید ډډه وشي. بیجنګ وايي، د هېوادونو ترمنځ پوځي همکاري باید د سیمې هېوادونو ترمنځ متقابل باور او ټیکاو ونه ګواښي.
د چین د بهرنیو چارو وزارت ویاند ګوو جیاکون په بیجینګ کې په یوه خبري ناسته کې وویل چې د اسیا پسیفیک سیمه تر ټولو ډېر سولې او ارامۍ ته اړتیا لري او دې ته کمه اړتیا ده، چې بهرني ځواکونه راشي او وېش او مقابلې ته لمن ووهي.
هغه زیاته کړه چې د هېوادونو ترمنځ پوځي همکاري باید داسې نه وي چې د سیمې هېوادونو ترمنځ متقابل باور وګواښي او یا ټیکاو زیانمن کړي.
دغه کلني پوځي تمرینونه چې د اوږه په اوږه په نوم یادېږي، د اپرېل له شلمې څخه د مې تر اتمې پورې دوام کوي.
په دغو تمرینونو کې د جاپان د ځان ساتنې ځواکونو غړي د لومړي ځل لپاره په ژوندیو ډزو کې برخه اخلي.
