د کونړ په مرکز اسعد اباد کې یو شمېر ځايي سرچینو افغانستان انټرنشنل – پښتو ته ویلي، چې نن شپه له یوولس نیمو بجو راهیسې یو ځل بیا د دغه ښار پر بېلابېلو سیمو د پاکستاني عسکرو له لوري توغندي توغول کېږي. سرچینو زیاته کړې چې تر اوسه په دغو بریدونو کې د مرګ ژوبلې په تړاو جزییات نشته.
تر دې دمخه هم د کونړ د مرکز اسعد اباد اړوند پر شهبازۍ، کڅۍ او کړه مار کلیو باندې د پاکستاني عسکرو له لوري د ډیورنډ کرښې له هغې غاړې توغندیز بریدونه شوي دي. تېره میاشت هم دغو بریدونو کې یو د ماشومانو په ګډون یو شمېر ملکي وګړو ته مرګ ژوبله اوښتې وه.
د یادونې وړ ده، چې د کونړ د یادو کلیو او همدا راز د یو شمېر نورو سیمو اوسېدونکي وخت ناوخت د پاکستان د توغندیزو بریدونو له کبله خپل کلي پرېږدي او د سرونو خوندي کېدو لپاره نورو سیمو ته کډه کېږي. که څه هم د طالبانو او پاکستان ترمنځ په دې وروستیو کې کړکېچ کم شوی، خو وخت ناوخت د پر کونړ د پاکستان له لوري راکټي بریدونه کېږي.
طالبانو د کړکېچ د حل لپاره د چین په ارومچي ښار کې له پاکستان سره مذاکرات هم وکړل چې ترې راوروسته د دواړو لوریو ترمنځ د مخامخ جګړو او هوایي بمباریو کچه په بې سارې توګه را کمه شوې ده، خو د پاکستان توغندیز بریدونه لا هم په بشپړه توګه نه دي ودرېدلي.
تر دې مخکې په پکتیکا ولایت کې هم یو شمېر اوسېدونکو شکایت کړی و چې ډیورنډ کرښې ته نږدې په ځینو ولسوالیو کې پاکستاني عسکر دې غاړه د هاوان مرمۍ توغوي.
