سېنټکام وايي، د هرمز د محاصرې له پیله ۲۸ کښتۍ د امریکا په امر ستنې شوې
د امریکا د پوځ مرکزي قوماندانۍ اعلان کړی، له هغه وخته چې د ایران پر جنوبي بندرونو او ساحلي سیمو یې سمندري محاصره پیل کړې، تر اوسه ۲۸ کښتیو د امریکايي ځواکونو په امر مسیر بدل کړی او بېرته د ایران بندرونو ته ستنې شوې دي.
سېنټکام په خپل تازه بیان کې ویلي چې دا محاصره د هغو کښتیو پر وړاندې پلي شوې چې د ایران جنوبي بندرونو ته روانې وې او یا هم له دغو سیمو څخه بهر وتلې وې.
د دوی په وینا، امریکايي ځواکونو دغه کښتۍ اړې کړې چې خپل مسیر بدل کړي او ایران ته ستنې شي.
د امریکا پوځ ټینګار کړی چې دا محاصره د ایران د حکومت پر وړاندې د فشار یوه برخه ده او هدف یې د کښتیو د ازاد تګ راتګ محدودول دي.
سېنټکام زیاتوي چې دا ګامونه د ایران د جنوبي ساحلونو د کنټرول لپاره اخیستل شوي دي.
د یادونې وړ ده چې د امریکا او د ایران د اسلامي جمهوریت ترمنځ اوسنی کړکېچ د سمندري محاصرې په دوام لا زیات شوی او دغه اقدام د ایران بندرونو ته د سوداګریزو کښتیو تګ راتګ جدي محدود کړی دی.
د سیمې نور هېوادونه هم د دغې محاصرې له امله اندېښمن دي.
