د کورش نړیوال فدراسیون د مشرتابه غړی د غېږ نیونې سیالۍ لپاره کابل ته رسېدلی
د طالبانو تر واک لاندې د المپیک ملي کمېټې رییس احمدالله وثیق وایي، د کورش نړیوال فدراسیون د مشرتابه غړی امید جان رستموف د دودیزې غېږ نیونې سیالۍ لپاره کابل ته رسېدلی دی. د نوموړي په وینا، ۴۶ نور بهرني لوبغاړي هم کابل ته رسېدلي دي.
د هغه په وینا تر دې دمه، د دغې سیالۍ لپاره له تاجکستان، ازبکستان، قرغیزستان او ترکمنستان څخه ۴۶ ورزشکاران هم کابل ته رسېدلي دي.
احمدالله وثیق د سې شنبې په ورځ پر اېکس پاڼه لیکلي چې د دودیزې غېږ نیونې نړیواله جشنواره د افغانستان په ګډون د اوو هېوادونو د ۶۰ بهرنیو او ۱۰۰ کورنیو ورزشکارانو ترمنځ د افغانستان په کوربه توب په پلازمېنه کابل کې کېږي.
یاده سیالۍ به د راتلونکې پنجشنبې په ورځ (د غويي پر درېیمه) پیل شي او درې ورځې به دوام وکړي.
