د پاکستان پخواني لومړي وزیر انوارالحق کاکړ ویلي چې د نړیوالو لهخوا منل شوي نړیوال نظم په اړه سیاسي هوکړه د مخ پر وړاندې تګ یوازینۍ اغیزناکه لاره ده. هغه د ډیورنډ کرښې په تړاو د محمد محقق دریځ ستایلی او وايي، نوموړی «یو معقول غږ» دی.
کاکړ زیاته کړې چې په تېر کې پاتې کېدل او د ټولنې یوې برخې ته «توهمي» ویل هېچا ته ګټه نه رسوي او دا ډول دریځونه د ستونزو د حل پر ځای اختلافات زیاتوي.
د طالبانو د کورنیو چارو وزارت وايي چې ددغه وزارت له نشه یي توکو سره د مبارزې مرستیال عبدالرحمن منیر ازبکستان هیواد ته د خپل سفر په لړ کې د یاد هېواد د کورنیو چارو له وزیر عزیز تاشپولادویچ سره لیدلي.
د طالبانو د کورنیو چارو وزارت نن سې شنبه، د مرغومي پر لومړی نېټه اعلان وکړ چې د ازبکستان د کورنیو چارو وزیر عزیز تاشپولادویچ ویلي، چې دا هېواد چمتو دی د نشه توکو پر وړاندې مبارزې په برخه کې له افغانستان سره خپلو همکاریو ته دوام ورکړي.
د طالبانو د کورنیو چارو وزارت په خبرپاڼه کې راغلي، چې دواړو خواوو د نشه یي توکو د مخنیوي په برخه کې د لا زیاتو خبرو اترو ترڅنګ، په سرحداتو کې د نشه یي توکو د مخنیوي لپاره د یوه تخنیکي ټیم پر جوړولو هم هوکړه وکړه.
دوی زیاتوي، چې دا تخنیکي ټیم به د نشه یي توکو د قاچاق پر وړاندې د مبارزې په برخه کې د ښې همغږۍ او اغیزمنتیا لپاره کار ورکړي.
د خبرپاڼې له مخې، دا سفر او په ترڅ کې یې شوې لیدنې د سیمې په کچه د نشه یي توکو پر وړاندې د مبارزې په برخه کې د همکارۍ د پیاوړتیا لپاره یو مهم ګام بلل کیږي.
په کابل کې ځايي سرچینو افغانستان انټرنشنل ته وویل، چې نن سې شنبه طالبانو د کابل د پلچرخې عالي لیسې د اسلامیاتو ښوونکی مولوي عبدالقدیم له څو زده کوونکو سره یوځای نیولي دي. تېره ورځ افغانستان انټرنشنل د عبدالقدیم ویډيو خپره کړه، چې له یو زده کوونکي سره له تاوتریخوالي ډک چلند کوي.
د کابل پلچرخي عالي لیسې ځينو زده کوونکو نن سې شنبه، د مرغومي پر لومړی نېټه وویل، چې د طالبانو د ۱۹ مې حوزې مسوولانو د اسلامیاتو له ښوونکي سره یوځای څو تنه زده کوونکي له ځان سره وړي دي.
دوی وايي، طالبانو یو شمیر زده کوونکي په دې تور نیولي، چې ویډیو یې ثبت کړې ده او رسنیو ته یې لېږلې ده.
طالبانو د پلچرخي لیسې د ښوونکي او زده کوونکو د نیولو په تړاو لاتر اوسه څه نه دي ویلي.
تېره ورځ د وري پر ۳۱مه افغانستان انټرنشنل د کابل د پلچرخي عالي لیسې په یوه ټولګي کې له یوه زده کوونکي سره له تاوتریخوالي د ډک چلند ویډیو خپره کړه.
د افغانستان په ښوونځیو کې له زده کوونکو سره د تاوتریخوالي دغه ویډیو یوازینۍ نه ده. له دې وړاندې هم ورته ګڼې ویډیوګانې خپرې شوې دي.
د پوهنې برخې شنونکي په ښوونیز سیستم کې د اصلاحاتو، د ښوونکو د ظرفیت لوړولو او د زدهکوونکو د خوندیتوب لپاره د رڼو پالیسيو اړتیا په ګوته کوي.
د عبدالله عبدالله پخواني ویاند مجیبالرحمان رحیمي ویلي چې پاکستان د خپلو اوسنیو پولو سره په رسمیت پېژني او ټینګار یې کړی چې له اسلام اباد سره باید هېڅ ډول سرحدي شخړه موجوده نه وي.
رحیمي پر خپل ایکس له افغانستان سره د پاکستان د اوسنیو ځینو سیمو د یوځای کېدو پر غوښتنې نیوکه کړې او ویلي یې دي چې دا موضوع دده په وینا، «ملي غوښتنه» نه ده، بلکې یوازې د یوې محدودې ډلې له خوا تعقیبېږي.
هغه زیاته کړې چې د «پښتونستان» موضوع د افغانستان د ځینو پښتنو له لوري مطرح کېږي، خو دا د ده په وینا، د « تاجکانو، هزاره وو، ازبکانو او نورو قومونو غوښتنه نه ده».
د نوموړي په وینا، ځینې کسان هڅه کوي دا موضوع پر نورو وتپي، خو د سیمې د نفوس او سیاسي واقعیتونو له مخې دا ډول ادعاوې له واقعیت سره سمې نه دي.
رحیمي ویلي: «موږ پاکستان له خپلو اوسنیو پولو سره په رسمیت پېژنو او له هېڅ هېواد سره سرحدي او ځمکنۍ شخړه نه لرو، بلکې د هېوادونو ترمنځ د ستونزو حل په خبرو اترو او همکارۍ کې وینو، نه په وېش او نیابتي جګړو کې.»
د روسیې د بهرنیو چارو وزیر سرګي لاوروف په مسکو کې د ګډ امنیت تړون سازمان د پارلماني جرګې غونډې ته وویل چې په افغانستان او شاوخوا سیمو کې بېثباتي جدي اندېښمنوونکې ده. هغه زیاته کړه، چې د ترهګرۍ او نشه يي توکو پر ضد جګړه دوام لري او باید لا ډېر پام ورته وشي.
د روسیې د بهرنیو چارو وزیر سرګي لاوروف د وري پر ۳۱مه د مسکو په غونډه کې چې د ډله ییز امنیت تړون سازمان پارلماني جرګې د شورا غړو پکې ګډون کړی و، د افغانستان او سیمې پر امنیتي وضعیت خبرې وکړې.
هغه وویل چې په افغانستان او شاوخوا سیمو کې بېثباتي د اندېښنې وړ ده او دا وضعیت پر ټولې سیمې اغېز لري.
لاوروف څرګنده کړه چې په افغانستان کې د ترهګرۍ او نشه یي توکو پر ضد مبارزه روانه ده او دا چاره دا ایجابوي چې روسیه او د سیمې هېوادونه ورته لا زیات پام وکړي.
نوموړي ټینګار وکړ چې باید له ګاونډیو او ملګرو هېوادونو، په ځانګړي ډول د ناپېیلو هېوادونو ټولنې او شانګهای همکارۍ سازمان له غړو سره همکاري زیاته شي.
د هغه په وینا، د شانګهای د همکاریو سازمان پراخ پروګرام لري چې موخه یې د ثبات او امنیت ټینګښت دی. لاوروف وویل، د ډله ییز امنیت تړن سازمان، ناپېیلو هېودونو سازمان او شانګهای د همکاریو سازمان عمومي منشیانو په دې وروستیو کې یوه نقشه تصویب کړې ده.
د روسیې د بهرنیو چارو وزیر وویل، سیمه ییز امنیت د ټولو ګډ مسوولیت دی او دا اړتیا شته چې د سیمې هېوادونه او سازمانونه په ګډه د ترهګرۍ، نشه یي توکو قاچاق او بېثباتۍ پر ضد همغږي اقدامات وکړي.
دا څرګندونې داسې مهال کیږي چې په افغانستان کې د طالبانو له واک ته رسېدو وروسته، د سیمې هېوادونه د امنیتي ګواښونو له اړخه اندېښمن دي خو طالبانو په افغانستان کې د وسله والو ډلو حضور رد کړی دی.
د طالبانو د اطلاعاتو او کلتور وزارت وايي، چې په تېر ۱۴۰۴ کال کې د کابل، ننګرهار، بلخ، سمنګان، جوزجان، فاریاب او کندهار ولایتونو ۱۹ زره کسانو ته د فریلانس کار، کمپیوټر، انګلیسي ژبې، ګرافیک ډیزاین، پروګرامینګ او د موبایل او کمپیوټر ترمیم په برخو کې زده کړې ورکړل شوې دي.
د طالبانو د اطلاعاتو او کلتور وزارت نن سې شنبه، د مرغومي پر لومړی نېټه ویلي چې په ۱۴۰۴ کال کې د فریلانسر په توګه په نړیوالو بازارونو کې په انلاین بڼه ۱۵۰۰ ځوانانو ته د کار زمینه برابره شوې ده.
یاد وزارت د معلوماتو له مخې، په ټولو ولایتونو د اطلاعاتو او کلتور ریاستونو اړوند ښوونیزو مرکزونو کې زرګونو تنو ځوانانو ته د انګلیسي او عربې ژبې، کمپیوتر پروګرامونو، املا او انشاء او ویناوالۍ په برخه کې د زده کړو زمینه برابره شوې ده.
د طالبانو د اطلاعاتو او کلتور د شمېرو له مخې ۴۰ خصوصي پوهنتونونو ته په تخفیف سره شاوخوا ۵۰۰۰ ځوانان ور پېژندل شوي دي.
دوی زیاتوی، چې ۳۰۰ بېوزله محصلانو او زده کوونکو ته د لیلیې اسانتیا برابره شوې ده.
یاد وزارت ویلي، چې ځوانانو ته د لا ښو خدماتو وړاندې کولو په موخه ۳۰ کورنیو او بهرنیو بنسټونو سره د همکاریو ناستې شوې دي.
د طالبانو اطلاعاتو او کلتور وزارت دغه ارقام داسې مهال خپریږي، چې په هېواد کې بې کاري او د عصري زده کړو پر ځای دیني زده کړو ته د طالبانو لومړیتوب ددې لامل شوی چې ګڼ ځوانان له هېواده ووځي.