کالاس: اروپايي ټولنه په ایراني چارواکو د بندیزونو پر لګولو هوکړې ته ورسېدل
د اروپایي ټولنې د بهرني سیاست مشرې کایا کالاس ویلي، د دې ټولنې ډېپلوماټانو د هغو ایراني چارواکو پر ضد د نويو بندیزونو پر لګولو هوکړه کړې چې د هرمز تنګي کې د کښتيو د تګ راتګ ازادي ګډوډوي.
د هغې په وینا، دا پرېکړه د هغو اقداماتو په غبرګون کې شوې چې د هرمز تنګي کې د کښتيو د ازاد تګ راتګ خنډ ګرځي. کالاس ټینګار کړی چې د نړیوال سمندري تګ راتګ ازادي د خبرو وړ موضوع نه ده او باید په بشپړه توګه خوندي وساتل شي.
هغې خبرداری ورکړی چې د هرمز تنګي وضعیت هره ورځ د بدلون په حال کې دی او دا چاره د سیمې او نړیوالې سوداګرۍ لپاره جدي خطر رامنځته کوي.
هغې زیاته کړې، چې د اروپايي ټولنې سمندري امنیت ماموریت کولای شي د سولې له ټینګېدو وروسته په فارس خلیج کې د خوندي تګ راتګ د تضمین لپاره چټکه او اغېزمنه لاره وي.
