پاکستاني پولیس: د پښتونخوا په مومندو ولسوالې کې مو د کوکنارو کروندې له منځه وړی دی

د پوليسو په وينا، دوی د امبار سیمې سور تنګي او شاتي مینه سیمو کې د کوکنارو د کښت پر ضد ګډ اقدامات وکړل او د چارواکو په وینا، شاوخوا ۲۵ جریبه ځمکه کرل شوی کوکنار یې بشپړ له منځه وړي دي.
په ورته وخت کې، د پرانګ غار د قلعې او ګورګره سیمو کې هم عملیات ترسره شوي. چارواکو ويلي، پر دغه سیمه کې یې هم په څو جریبه ځمکه کرل شوي کوکنار له منځه وړي دي.
پولیسو ویلي، دا عملیات به تر هغې دوام ولري چې د کوکنارو وروستی بوټی هم له منځه ولاړ نه شي.
د یادولو وړ ده، چې په پاکستان کې د نشه‌یي توکو د کر او کاروبار ستونزه لا هم جدي ده. د ملګرو ملتونو د مخدره موادو او جرمونو ادارې د راپورونو له مخې، که څه هم د دودیزو موادو لکه اپیمو تولید کم شوی، خو به دغه هېواد کې مصنوعي نشه‌يي توکي زیات شوي دي.