مولانا فضل الرحمان: عمران خان باید خوشې شي او د سیاسي فعالیتونو اجازه ورکړل شي
د جمعیت علماء اسلام ګوند مشر مولانا فضل الرحمان له خبریالانو سره د خبرو پرمهال ويلي، چې د تحریک انصاف ګوند بنسټګر او د پاکستان پخوانی لومړی وزیر عمران خان باید له زندانه خوشې شي او هغه ته د هېواد په ټولو چارو کې د سیاسي رول لوبولو اجازه ورکړل شي.
نوموړي زیاته کړې، چې د عمران خان له ګوند سره يې په تېر کې د ځینو موضوعاتو په اړه خبرې کړې وې؛ خو کومې پایلې ته نهوو رسېدلي.
عمران خان له ۲۰۲۳کال راهیسې له بېلابېلو قضیو سره مخ او په زندان کې دی. د حکومت مخالف ګوندونه وایي، چې پر عمرانخان لګېدلي تورونه سیاسي بڼه لري؛ خو د پاکستان حکومت بیا ټینګار کوي، چې ټولې قضیې د قانون له مخې پر مخ وړل کېږي.
تر دې وړاندې د خیبر پښتونخوا سر وزیر سهیل اپریدي هم ویلي و، چې د تحریک انصاف ګوند بنسټ اېښودونکي عمرانخان خوشې کول «د هېواد د پراخو مليګټو لپاره» مهمه اړتیا ده. نوموړي زیاته کړې وه، چې د عمرانخان د خوشې کولو لپاره به ټول ممکنه اساسي او ولسي هڅې ترسره شي.
د هغه په وینا؛ د عمرانخان خراب روغتیايي وضعیت یوازې سیاسي موضوع نه؛ بلکې د هغه د ژوند او روغتیا اړوند جدې مسله ده او باید له پامه ونه غورځول شي.
