په خیبر پښتونخوا کې تر دې دمه د افغان کډوالو لس پنډغالي خالي شوي

نوموړي دا څرګندونې د چارشنبې په ورځ، د غويي پر دویمه، د خیبر پښتونخوا د والي فیصل کریم کنډي په مشرۍ د افغان کډوالو د وضعیت په تړاو د یوې غونډې پر مهال کړې دي.

کمشنر شکیل صافي ویلي چې پخوا په پېښور، نوښار، دیره اسماعیل خان، کوهاټ، بونیر، مردان، صوابۍ، ملاکنډ، دیر، مانسهرې، بنو، لکي مروت، ټانک، هريپور او چترال کې ۴۳پنډغالي جوړ شوي وو، خو اوس لس میشتغالي له کډوالو خالي شوي دي.

نوموړي زیاته کړه چې د پاکستان د احصایې یا نادرا ادارې د لنډي کوتل او تورخم په سیمو کې د بایو میټریک اسانتیاوې برابرې کړې دي او افغان کډوال د بایو میټریک او معلوماتو له ثبت وروسته اسناد ترلاسه کوي چې له امله یې دده په وینا، «سرحدي تګ راتګ اسانه شوی دی».

پاکستاني چارواکو ویلي، هره ورځ له تورخم پولې شاوخوا ۳ زره افغان کډوال بېرته افغانستان ته ستنېږي، خو امنیتي اندېښنو او د دروازو د تړلو له امله د کډوالو ستنېدل ځینې وختونه له ستونزو سره مخ کېږي.

شکیل صافي دا هم ویلي چې د غیرقانوني میشتو کډوالو بانکي حسابونه او موبایل سیم کارتونه بند شوي دي.