د طالبانو د سرحدونو، قومونو او قبایلو چارو وزیر ملا نورالله نوري په تخار ولایت کې په یوه غونډه کې یوځل بیا ویلي، چې پاکستان غواړي ډیورنډ کرښه په سرحد بدله شي، خو نوموړی وايي، داسې به ونه شي. نوري وايي، دوی له چا سره د جګړې اراده نه لري، خو د هېواد دفاع د سر په بیه کوي.
د طالبانو د قومونو، سرحدونو او قبایلو چارو وزیر، چې په دې ورځو کې د افغانستان په شمالي ولایتونو کې قومي غونډو ته ویناوې کوي، په تخار کې تازه په یوه غونډه کې ویلي، چې پاکستان غواړي ډیورنډ کرښه په سرحد بدله شي، خو دا سرحد نه دی او نه به شي.
نوري غونډې ته په خبرو کې وویل، « د پاکستان شوم اهداف دادي چې په افغانستان کې مستحکم حکومت رانه شي، غواړي ډیورنډ کرښه سرحد شي، دا رسمي سرحد نه دی او نه به شي».
د طالبانو د قومونو او قبایلو چارو وزیر وویل، چې دوی د جګړې اراده نه لري، خو که مقابل لوری پرې جګړه وتپي، دفاع پرې فرض عین ده او د خپلې لوېشت لوېشت خاورې ساتنه او دفاع به د سر په بیه کوي.
هغه زیاته کړه چې افغانستان اوس مهال له بشپړ امنیت او خپلواکۍ څخه برخمن دی او ولسونه دده په وینا، خپلو هیلو ته، چې د اسلامي نظام راتګ و، رسېدلي دي.
په دې غونډه کې چې د اسلامي نظام د پېژندنې او ارزښتونو په نامه جوړه شوې وه، ملا نورالله نوري وویل چې افغان ولسونه د هر ډول ننګونو پر وړاندې ولاړ دي او د خپلې خاورې د دفاع لپاره هر ډول سرښندنې ته چمتو دي.
د طالبانو د قبایلو چارو وزیر له دې وړاندې هم په یوه غونډه کې ویلي و، چې پاکستان غواړي د جګړې او نښتو له لارې نړیوال منځګړي راولي او ډیورنډ کرښه د سرحد په توګه ورسره ومنل شي.
ډیورنډ کرښه د افغانستان او پاکستان ترمنځ لانجمنه کرښه ده، چې افغان حکومتونو او په سیمه کې پرتونو قومونو له تېرو ۷ لسیزو راهیسې رد کړې ده، خو پاکستان دغه کرښه نړیوال سرحد ګڼي.
