د کار نړۍوال سازمان: د ۲۰۲۵کال سېلابونو په پاکستان کې ۳.۳ مېلیونه دندې لهمنځه وړې دي
د کار نړۍوال سازمان په خپل تازه خپور شوي راپور کې ويلي، چې په پاکستان کې د تېر ۲۰۲۵کال سېلابونو له امله نږدې ۳.۳ مېلیونه دندې یا لهمنځه تللې او یا هم سختې زیانمنې شوې دي.
د راپور له مخې؛ د دندو تر ټولو لویه برخه ۲۸ سلنه په لرو پرتو کلیوالو سیمو کې لهمنځه تللې، د کرنې څانګه تر ټولو ډېره زیانمنه شوې او ورپسې خدماتي او صنعتي سکتورونه راځي.
یاد سازمان وايي، دغه ارزونه د پنجاب او خیبر پښتونخوا په ۱۴ سختو اغېزمنو ولسوالیو کې ترسره شوې چې له ډلې يې نهه ولسوالۍ د پنجاب ایالت دي. د راپور له مخې؛ که څه هم ایالتي حکومتونو په دې برخه کې بېړني ګامونه اخیستي او ځینې مرستې یې برابرې کړې؛ خو لاهم اړتیا ده چې د عاید او ژوند د بېرته رغونې لپاره پراخ او دوامدار ګامونه پورته شي.
