د طالبانو تر کنټرول لاندې د هواپوهنې ادارې خبر ورکړی، چې نن او سبا (د غویي ۳مه او ۴مه) په ۲۷ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل شوی دی.
یادې ادارې د یوې خبرپاڼې په خپرولو سره ویلي، چې دغه وړاندوینه د نورستان، کونړ، ننګرهار، لوګر، پکتیا، خوست، لغمان، کاپیسا، کابل، پنجشېر، پروان، میدان وردګ، بغلان، سمنګان، بدخشان، بلخ، فاریاب، بادغیس، هرات، فراه، جوزجان، سرپل، غور، بامیان، غزني، دایکنډي او تخار ولایتونو لپاره شوې ده.
د خبرپاڼې له مخې؛ په بېلابېلو سیمو کې د باران کچه ( له ۱۰ تر ۳۰) ملي مترو پورې اټکل شوې ده.
خبرپاڼه کاږي، په مرکزي، ختیځو او سویل ختیځو ولایتونو کې د تېزو بادونو اټکل هم شوی، چې په بېلابېلو برخو کې یې د چټکوالي کچه په یوه ساعت کې (له ۵۰ تر ۹۰ کیلو مټرو) اټکل شوې ده.
تازه په بادغیس او میدان وردګ ولایتونو کې د سېلابونو له امله د دوو ښځو په ګډون اووه کسان مړه شوي او په غور کې یې تر سلو ډېر کورونه زیانمن کړي دي.
