د طالبانو د سترې محکمې د راپور له مخې، د روانې میاشتې په لومړۍ اونۍ کې په فراه، جوزجان، بلخ، میدان وردګ او بدخشان ولایتونو کې دغه ډلې ۴۶ کسان د بند ترڅنګ په عام محضر کې په دُرو وهلي دي.
د طالبانو سترې محکمې په خپل اونیز راپور کې ویلي، چې د هېواد په بېلابېلو ولایتونو کې د قضايي پرېکړو له مخې په تېره یوه اونۍ کې یو شمېر کسان د بند د سزاوو او د دُور وهلو له اجرا سره مخ شوي دي.
د راپور له مخې، په فراه ولایت کې ۱۴ کسان، په جوزجان کې ۲۷ تنه، په بلخ ولایت کې یو کس، په میدان وردګ کې دوه کسان او په بدخشان ولایت کې هم دوه کسانو ته سزاوو ورکړل شوې ده.
د یادو قضیو په اړه په رسمي راپور کې د جرمونو نوعیت په جلا ډول نه دی تشریح شوی، خو ویل شوي چې دا پرېکړې د محکمو له لوري د ترسره شوو قضايي پروسو وروسته عملي شوې دي.
د طالبانو ستره محکمه زیاتوي، چې دا سزاوې د طالب محکمو د وروستیو پرېکړو پر بنسټ په بېلابېلو سیمو کې تطبیق شوې دي.
دا په داسې حال کې ده، چې د طالبانو محکمې وخت ناوخت د سزاوو، په ځانګړي ډول د دُرو وهلو د تطبیق راپورونه خپروي، چې په کور دننه او نړیواله کچه د بشري حقونو د بنسټونو له نیوکو سره هم مخ کېږي.
