محلي سرچینې وایي چې د بدخشان ولایت د فیضاباد ښار په «برهانالدین رباني» روغتون کې د مولوي بشیرالدین په نامه یوه زورواکي کس یوه ښځینه روغتیاپاله د کار پر مهال وهلې او سپکاوی یې ورته کړی دی. پېښه د تېرې دوشنبې په شپه شوې ده.
سرچینې وایي، یاد کس د خپلې لور ددر ملنې پرمهال، چې د وینې په سرطان اخته وه او په همدغه روغتون کې بستر وه، غوسه شوی او روغتیاپالې ته یې د نورو کارکوونکو پر وړاندې څپېړه ورکړې ده.
ویل کېږي روغتیاپاله د اکسیجن لګولو په حال کې وه، خو د ناروغې پلار ناڅاپه غبرګون ښودلی او پر هغې یې فزیکي برید کړی دی.
د سرچینو په وینا، د سپکاوي او لفظي توهین له امله روغتیاپاله تر سخت فشار لاندې راغلې، بېهوښه شوې او پر ځمکه غورځېدلې ده. وروسته په سد شوې او د دغه چلند پر ضد یې اعتراض کړی دی.
سرچینې زیاتوي چې مولوي بشیرالدین له پېښې وروسته یوه سیمهییز طالب چارواکي مولوي طیب ته زنګ وهلی او ادعا یې کړې چې روغتیاپالې مقدساتو ته سپکاوی کړی، خو سرچینې دا ادعا د فشار راوړلو هڅه بولي.
ویل کېږي مولوي طیب چې اوس د طالبانو د ښاروالۍ کارکوونکی دی او پخوا په امنیتي برخه کې هم پاتې شوی، له خپل نفوذ نه ناوړه ګټه اخلي.
له پېښې وروسته د روغتون ډاکټرانو او کارکوونکو د طالبانو نظامي څارنوالۍ ته رسمي شکایت سپارلی، خو تر اوسه یې په اړه هېڅ اقدام نه دی شوی. همدارنګه ویل کېږي چې روغتیاپالې د بدخشان علماوو شورا ته هم شکایت کړی، خو هلته هم پېښه نه ده تعقیب شوې.
دا پېښه په داسې روغتون کې شوې چې د فیضاباد ښار په مهمه برخه کې دی او پخوا د اغاخان بنسټ له خوا اداره کېده، خو شاوخوا پنځه میاشتې وړاندې یې مدیریت د طالبانو یوې نږدې کمپنۍ ته سپارل شوی دی.
ځايي اوسېدونکي او د روغتون کارکوونکي وایي چې له دغه بدلون وروسته د خدماتو کیفیت کم شوی، بېنظمي زیاته شوې او د درملو کمښت او د کمتجربه کارکوونکو ګومارل هم زیات شوي دي.
