په ننګرهار کې د لومړي ځل لپاره ګډه ورزشي مېله ترسره شوه
په ننګرهار د طالبانو د المپیک، بدني روزنې او ورزش ریاست له لوري د ورزش د ودې او د ورزشکارانو د هڅونې په موخه د لومړي ځل لپاره ګډه ورزشي مېله د جلالاباد ښار په سراجالعمارت بڼ کې ترسره شوه.
د طالبانو د ننګرهار ولایت د رسنیو دفتر له خوا په خپره شوې خبرپاڼه کې راغلي، په دې مېله کې د بېلابېلو ورزشي رشتو لکه ووشو، تکواندو، سوکوهنې، جودو، پارکور او منډې سیالۍ او نندارې وړاندې شوې.
د خبرپاڼې له مخې، په دغه مراسمو کې د ننګرهار د ورزش رییس عبدالسلام وزیروال، د ځوانانو چارو مسوولین، د بېلابېلو فدراسیونونو استازي او ګڼ شمېر ورزشکارانو او د ورزش مینهوالو ګډون کړی و.
خبرپاڼه زیاتوي، د ننګرهار د ورزش رییس عبدالسلام وزیروال وویل چې د دې مېلې موخه د ورزش پراختیا، د ځوانانو هڅونه او د سپورتي فعالیتونو وده ده.
نوموړي زیاته کړه چې په راتلونکي کې به د ورزش د لا پراختیا لپاره ورته نورې ورزشي پروګرامونه او مېلې هم ترسره شي.
