د افغانستان د سنوکر فدراسیون د پخواني رییس وحید اصغري مړی موندل شوی
د افغانستان د سنوکر فدراسیون خبر ورکړی، چې ددغه فدراسیون د پخواني رییس وحید اصغري مړی موندل شوی. نوموړی دوه شپې وړاندې په قلعه فتح الله کې وسله والو د خپل کور له مخې تښتولی و. د طالبانو المپیک، بدني روزنې او سپورټ ادارې د اصغري د مړینې په اړه د پلټنو غوښتنه کړې ده.
د افغانستان د سنوکر ملي فدراسیون عمومي سکرټر شکیب سخي تایید کړې چې وحید اصغري د روانې اونۍ د سېشنبې په ورځ د کابل ښار په قلعه فتحالله کې د خپل کور له مخې نه تښتول شوی و او نن یې مړی کورنۍ ته ورسپارل شوی دی.
په ورته مهال د طالبانو المپیک، بدني روزنې او سپورټ ادارې هم د افغانستان د سنوکر ملي فدراسیون د پخواني رییس مړینه تایید کړې او له اړوندو ادارو یې د هغه د مرموزې مړینې په تړاو د پلټنو غوښتنه کړې ده.
