د پېښور مرکزي زندان کې د لومړي ځل لپاره دوه نرښځیان د بندیانو د څارونکو په توګه ټاکل شوي
د خیبر پښتونخوا چارواکو اعلان کړی، چې د دغې صوبې په تاریخ کې د لومړی ځل لپاره دوه نرښځیان د پېښور مرکزي زندان کې د څارونکو په توګه ټاکل شوي دي. د زندان سرپرست ویلي، تمه ده، چې صوبیه خان او زهیب به راتلونکې اونۍ د پېښور په مرکزي زندان کې خپلې دندې پیل کړي.
د پېښور د مرکزي زندان د سرپرست په وینا، دا ګام د ټولنیزې تنوع او شمولیت د هڅو یوه برخه ده. هغه ویلي.، چې دواړه نرښځیان کارکوونکي به د زندان د نظم او امنیت ساتنه کوي او ورته د نورو څارونکو په څېر مسوولیتونه سپارل شوي دي.
چارواکو زیاته کړې، دا لومړی ځل دی چې په خیبر پښتونخوا کې نرښځیانو ته د دولتي ادارو په کچه رسمي دنده ورکول کېږي. د زندان سرپرست ویلي، د دې پرېکړې هدف دا دی، چې نرښځیان د ټولنې په بېلابېلو برخو کې فعاله ونډه ولري.
د صوبیه خان او زوهیب نومونه رسماً اعلان شوي او ټاکل شوې ده، چې د راتلونکې اونۍ له پیل سره سم خپلې دندې پیل کړي. چارواکي وايي، دا ګام به د نرښځیانو ټولنې لپاره د فرصتونو دروازې پرانیزي او د ټولنیز شمولیت پیغام به ورسوي.
په خیبر پښتونخوا کې د خواجه سرا ټولنه له کلونو راهیسې د کار او تعلیم په برخه کې له ستونزو سره مخ ده. د زندان سرپرست تمه څرګنده کړې، چې د دغې ګومارنې په ټرڅ کې به نورې دولتي ادارې هم ورته ګامونه پورته کړي.
