د ايران امنيت شورا ته نږدې سرچينې: په پاکستان کې له امريکا سره خبرې نهکوو
د فارس خبري اژانس پاکستان ته د عباس عراقچي سفر ته په اشارې د ایران د اسلامي جمهوريت امنيت شورا ته د نږدې سرچينو له قوله راپور ورکړی، چې «له امريکا سره هېڅ ډول خبرې اترې نهدي پلان شوي».
دې اژانس زياته کړې، چې د رسمي معلوماتو لهمخې، د ايران د بهرنيو چارو د وزير عباس عراقچي اوسنی سفر «له اسلاماباد سره د دوهاړخيزو سلا مشورو په دوام کې دی او په بشپړه توګه د امريکايي پلاوي د سفر له پروګرامه جلا دی».
فارس د ايران د بهرنيو چارو وزارت د وياند پخوانيو څرګندونو ته هم اشاره کړې، چې ويلي يې وو: «له امريکا سره د خبرو هر ډول پرېکړه به يوازې د ملي ګټو پر بنسټ او په مناسب وخت کې وشي».
تر دې مخکې، سپاه پاسداران پورې تړلي «تسنيم» خبري اژانس هم راپور ورکړی وو، چې د ايران د بهرنيو چارو وزير د پاکستان په سفر کې «له امريکايانو سره هېڅ خبرې په اجنډا کې نهلري».
دغه اژانس ويلي: «د عراقچي سفر اسلاماباد ته د دې لپاره نهدی چې له امريکايانو سره خبرې وکړي، بلکې هغه به له پاکستاني لوري سره د جګړې د پای ته رسېدو په اړه د ايران نظرونه شريک کړي».
دا په داسې حال کې ده، چې د سپينې ماڼۍ وياندې کارولين ليوېټ مخکې ويلي وو، چې سټيو وېټکاف او جېرډ کوشنر به د شنبې په سهار پاکستان ته واستول شي، څو د ایران د اسلامي جمهوريت په تړاو خبرو کې برخه واخلي.
