عراقچي له خپلو شریکانو سره د نږدې همغږۍ په موخه اسلاماباد، مسقط او مسکو ته سفر پیل کړ
د ایران د بهرنیو چارو وزیر عباس عراقچي اعلان وکړ، چې د سیمهییزو مشورو او دوه اړخیزو همکاریو په موخه یې پاکستان، عمان او روسیې ته خپل سفرونه پیل کړي دي. نوموړي پر خپله اېکس پاڼه لیکلي، چې په دغه سفر کې به له شریکانو سره د سیمې د وضعیت او دوه اړخیزو مسایلو په اړه نږدې همغږي وکړي.
عباس عراقچي نن ماښام پر خپله رسمي اېکسپاڼه ولیکل، چې دا سفر د ګاونډیانو د لومړیتوب په چوکاټ کې ترسره کېږي.هغه دا سفر پر وخت وباله او زیاته یې کړه چې موخه یې د سیمې له شریکانو سره د وروستیو بدلونونو په اړه سلامشورې دي.
دا ډیپلوماټیک سفر پر داسې مهال ترسره کېږي چې په منځني ختیځ کې د ایران او امریکا ترمنځ د کړکېچ د کمولو لپاره د منځګړیتوب هڅې ګړندۍ شوې دي. عراقچي ټینګار کړی چې ګاونډي هېوادونه د ایران په بهرني سیاست کې ځانګړی لومړیتوب لري او له هغوی سره همغږي د ثبات لپاره اړینه ده.
تمه کېږي چې عراقچي به په لومړي پړاو کې اسلاماباد ته ورسېږي، چېرته چې تر دې وړاندې د امریکا او ایران د استازو د احتمالي لیدنو په اړه هم راپورونه خپاره شوي وو.
په همدې حال کې، راپورونه ورکړل شوي، چې د ایران د پارلمان رییس محمدباقر قالیباف د امریکا سره د خبرو اترو د پلاوي له مشرۍ څخه لاس په سر شوی دی.
