د ایران د بهرنیو چارو وزیر اسلام‌اباد ته ورسېد

په دغو لیدنو کې به د سیمې تازه بدلونونه، د دواړو هېوادونو ترمنځ اړیکې او د سیمې د سولې او ثبات لپاره روانې هڅې وڅېړل شي.
د پاکستان د بهرنیو چارو وزارت د جمعې په ماخوستن (د غويي ۴مه) په خپله اېکس‌پاڼه د یوې خبرپاڼې په خپرولو سره ویلي، د دې سفر موخه د سیمې پر وضعیت بحث، د سولې او ثبات د ټینګښت لپاره همغږي او د دوه اړخیزو اړیکو پیاوړتیا ده.
عباس عراقچي د خپل سفر په پیل کې په خپله اېکس‌پاڼه لیکلي: «زه اسلام‌اباد، مسقط او مسکو ته پر وخت سفر پیلوم».
هغه زیاته کړې، «زما د دې سفرونو موخه دا ده، چې له خپلو شریکانو سره په دوه اړخیزو چارو کې له نږدې همغږي وکړو او د سیمې د پرمختګونو په اړه سلا مشورې وکړو».
عراقچي په داسې وخت کې پاکستان ته سفر کړی چې اسلام‌اباد د واشنګټن او تهران ترمنځ د دويم پړاو خبرو لپاره تابیاوې نیسي.

د یادونې وړ ده، چې عباس عراقچي به تر دې وروسته مسقط او همداراز مسکو ته هم سفرونه وکړي.