د چین د بهرنیو چارو وزارت د ایران د بېړۍ په اړه د ډونالډ ټرمپ ادعاوې رد کړې
د چین د بهرنیو چارو وزارت د امریکا د ولسمشر ډونالډ ټرمپ هغه څرګندونې په کلکه رد کړې، چې ګواکې د امریکا له خوا نیول شوې ایراني بېړۍ له چین څخه ایران ته یوه «ډالۍ» لېږدوله. د چین حکومت دا ډول خبرې بېبنسټه بللې دي او پر واقعي شواهدو د ټینګار غوښتنه یې کړې ده.
د چین د بهرنیو چارو وزارت ویاند ګوو جیاکون د جمعې په ورځ د یوې خبرې ناستې پر مهال د ډونالډ ټرمپ د وروستیو ادعاوو په غبرګون کې ویلي، چې د دغې بېړۍ په اړه اټکلونه هېڅ ډول کره او واقعي شواهد نه لري. د چین د بهرنیو چارو وزارت ویاند ټینګار کړی چې د هېوادونو ترمنځ عادي سوداګري باید د بېبنسټه څرګندونو له امله ګډوډه نه شي او ټولو لوریو ته په کار ده چې دغو اړیکو ته درناوی وکړي.
دا په داسې حال کې ده، چې ډونالډ ټرمپ ادعا کړې وه، هغه ایراني بار وړونکې بېړۍ چې د امریکا له خوا نیول شوې، ښایي د بېجینګ له خوا تهران ته یو ځانګړی پیغام یا ډالۍ لېږدوله. خو بېجینګ وايي چې د هغوی سوداګریز فعالیتونه د نړیوالو قوانینو په رڼا کې دي او دا ډول تورونه ردوي.
