د پاکستان په پلازمېنه کې د امنيتي محدوديتونو کمول پيل شول
د پاکستان حکومت وروسته له هغې چې د امريکا ولسمشر ډونالډ ټرمپ اسلاماباد ته د امريکايي پلاوي د سفر د لغوه کېدو اعلان وکړ، په پلازمېنه کې د امنيتي محدوديتونو د کمولو لړۍ پيل کړه.
په اسلاماباد کې ځايي چارواکو د شنبې په ماښام (د غويي ۵مه) اعلان وکړ، چې ښار ته د ټولو عامه او بار وړونکو وسايطو د ننوتلو اجازه ورکړل شوې ده. همدارنګه، د پلازمېنې ټول بس تمځایونه بېرته پرانيستل شوي، خو د فيضاباد تمځای به تر بلې خبرتیا پورې تړلی وي.
دا ګام وروسته له هغې اخيستل شوی، چې نږدې يوه اونۍ په اسلاماباد کې د نيمه قرنطين په څېر حالت حاکم وو، چې د سلګونو زرو اوسېدونکو ژوند يې اغېزمن کړی وو. تمه ده، چې د محدوديتونو په کمېدو سره به په پلازمېنه کې د مېوو، سابو او نورو اړينو توکو د برابرولو بهير ښه شي.
